КОМИ ПОСНИ ЧЕЛЯДЬ ВИЧЧЫСЬӦНЫ

1924 воын март тӧлысьын воссис Сыктывдінкарын коми челядьлы детскӧй сад. Челядь чукӧртчисны регыд, садйыд тыри. Колян во Обоно ӧтлааліс коми садсӧ роч центральнӧй садкӧд, мед ӧткодя кутас уджыс мунны.

Таво кӧсйис Обоно ещӧ ӧти группа содтыны, вӧлі гижӧма сы йылысь газетӧ. Эз тай дыр ков виччысьны — регыд коми мам-бать кутісны ваявны заявленньӧяс: «Босьтӧй менсьым, босьтӧй менсьым», — шуӧны найӧ. «Босьтам, босьтам», — налы воча кыв видзӧны, радӧсь, виччысьӧны.

Но вот воис нин пӧра, а коймӧд группа век на абу, дай оз гашкӧ и ло — сметасьыс сійӧс киритӧмаӧсь. Нинӧм на пӧ коми челядьлы детскӧй садъяс волӧмысь, мед пӧ гортас мамыслысь да бабыслысь велӧдчасны выль олӧм овны... Быд лун локтӧны бать-мам, юасьӧны: «Кор нӧ ваям челядьтӧ? Воссяс оз нӧ коймӧд группаыд? Али нӧ рочьясӧс сӧмын велӧданныд? Асьныд тай нӧ быдлаын висьталанныд — зыранизация пӧ ӧні. Озыръяссӧ тай чукӧртӧмныд — рочьястӧ, миянлысь онӧ босьтӧ?» Ӧти мам вайис да пӧрччӧдӧ писӧ. «Абу на ӧд босьтӧма, эн на коль», — шуӧны сылы. «Коля дай велӧдӧй, ме — дӧва, кытчӧ вошта тайӧс? Мукӧдӧс тай босьтӧмныд». Мӧд бурджыка корӧ: «Ме талун кольла»... Аски бара тадзи.

Колӧ жӧ эськӧ восьтыны коймӧд коми группатӧ да. 22 коми челядь виччысьӧны. Дыр-ӧ нӧ налы виччысьныс?

Коми морт.