ЛОВЪЯ ПАМЕТЬ

Паметьысь вошӧма важӧн
Кокниа кольӧм быд лун,
Сӧмын вот кӧдзыд блиндажӧй
Мыйлакӧ некыдз оз вун.
Дзебсьывлім сэтчӧ сьӧд войын,
Неуна ланьтліс кор би,
Ловъяяс,
Кодъясӧс бойын
Пуля эз дойд либӧ ви.
Пӧрччысьтӧг сідз сэк и водлім,
Вок бердӧ водӧ кыдз вок
Юасьтӧг,
Ветлыны кодлы,
Вайны мед кӧдзалӧм рок...
Медбӧръя вой, гашкӧ, шонтӧ
Кодӧскӧ кӧдзыд блиндаж...
Ми бӧрын кыдз сэсся пондас
Выль йӧзлӧн пуксьыны гаж?
Некор оз сет мортлӧн вежӧр,
Мӧвпалім,
Кыпӧдны кось,
Весиг и тыбокса эжӧр
Дой вӧчны лоас зэв ёсь.
Ловъя ме...
На водзын яндзим,
Кодъяслӧн оз кувлы ним,
Кыла кор,
Ас синмӧн аддза,
Енэжсӧ кыдз вевттьӧ сім...
Мортӧн мӧй нимтанныд сійӧс,
Коді пыр вӧтасьӧ вир?..
Ачыс Иудалӧн пи моз
Чегъялас мед сьылідзир!