СЫКТЫВКАРЫН НЕКОР КУСЛЫТӦМ БИ

Миян карлӧн тайӧ джуджыд нӧрыссяньыс, кӧні ӧні ӧзйӧ куслытӧм би, 1941 воын гожся асылӧ ми чукӧртчим мунны фронт вылӧ.
Ми вӧлім унаӧн, — батьяс да пиян, — Сыктывкарысь, Эжва да Сыктыв вожса сиктъясысь.
Пӧшти нёль во кыссис фашистъяскӧд вир кисьтана тышыс. Некор эн вунӧдӧй, талун олысьяс, медым оз вунӧдны выль нэмъясын олысьяс пӧльяслысь да батьяслысь подвигсӧ.
...Кывтасны вояс, но сьӧлӧмад дойыд некор, ме тӧда, оз бурд на кузя, кодъяс фашистъяскӧд бойын пуктісны ассьыныс юр. Казьтывны кутас пыр вежӧдысь пуыд бать-мамлысь вунлывтӧм шог: куйлӧны найӧ лӧнь эрдвывса гуын бать, муса верӧс да вок. Помнитӧй найӧс да налысь быд вуджӧр, киподтуй, синъяслысь сер. Помнитас мед, коді сёрӧнджык чужас, нӧйтіс кыдз миянӧс шер. Крепыда кутӧ гвардейскӧй застава мирнӧй границалысь визь. Усьӧмлысь подвиг да кувлытӧм слава видзӧ быд сьӧлӧм, быд из.
Аддзанныд, сувтісны усьӧм верӧсъяслы, пиянлы да вокъяслы ӧзтӧм би дінас мам, гӧтыр да чой. Найӧ сэки ставсӧ вӧчисны, медым отсавны пасьвартны фашистъясӧс да матыстны Победа лун.
Куим нывбаба некор оз вешйыны куслытӧм би дінысь.
...Ӧзйӧ куслытӧм би карлӧн медкыпыдінын, кытчӧ веськалӧ пыр шонді югӧр да тӧв. Чӧла сулалысь сэн куим нывбаба дінын усьӧм войтырлӧн нимъясӧн мраморысь пӧв. Тайӧ мыльк вывсянь мунісны батьяс да пиян, сьӧкыд воясӧ вӧрӧгысь дорйыны му, но эз бӧр локны гортаныс адын кодь биысь, муса мамъяс оз тӧдны быд бур пилысь гу. Ӧзйӧ куслытӧм би ясыд лунӧ и войын, зэр оз кусӧд, кӧть мыйта сӧдз ванас оз кой. Куим нывбаба кынмисны шогысь да дойысь, найӧ, кодъяслы синванас мыссьыны лои, — муса мам, дона гӧтыр да чой.
Ме ачым вӧлі фронт вылӧ мунысьяс лыдас, накӧд тшӧтш кынмалі окопъясын да сьӧлӧмын видза налысь мӧвпъяссӧ, талунъя олысьяслы веськӧдӧм кывъяссӧ.
...Паметьысь вошӧма важӧн кокниа кылалӧм лун, сӧмын тай кӧдзыд блиндажӧй мыйлакӧ некыдз оз вун. Дзебсьывлім сэтчӧ сьӧд войын, неуна ланьтліс кор би, ловъяяс, кодъясӧс бойын пуля эз дойд либӧ ви. Тшыналіс му джоджын пеша — гильзаӧ топӧдӧм кӧв. Сёрни кӧ пансьыліс этша, сьӧлӧмным эз тӧдлы чӧв... Медбӧръя вой, гашкӧ, шонтӧ миянӧс кӧдзыд блиндаж. Ми бӧрын кыдз сэсся пондас выль йӧзлӧн пуксьыны гаж? Некор оз сет мортлӧн вежӧр, мӧвпалім, кыпӧдны кось, весиг и тыбокса эжӧр дой вӧчны лоас зэв ёсь. Ловъя ме... На водзын яндзим, кодъяслӧн оз кувлы ним, кыла, кор ас синмӧн аддза, вевттьӧ кыдз енэжсӧ сім... Мортӧн мӧй нимтанныд сійӧс, бара код дась кисьтны вир? Ачыс мед Иуда пи моз чегъялас пеж сьылідзир!
Гижӧд
Сыктывкарын некор куслытӧм би
Жанр: 

lkejrlkelkrgner klrjnelknfrkl ekjnrjkenfrej

1