* * *

Фортуна князькӧд оліс,
	И князьлӧн лоліс,
	Мый сылы коліс.
А ӧтпыр лун шӧр луна
Сэсь лыйыштас фортуна.
Кӧть сералӧм кодь лоас —
Философ дінӧ воас.
	«Быдсяма морт пӧ овлӧ!
Князь зарни вӧлі новлӧ,
Князь зарни вылысь сёйис
И зарни йӧзлы койис...
Трон му вылын эз коль,
Мед лоис тай король!
Ме сылы вӧчлі тадз,
А шуис на: тэ надз!
И князьшӧн колис ӧтнас,
М’оз аддзыв менӧ-й вӧтнас!
Ме важӧн тэнӧ тӧді
И шудлун тэныд сетны мӧді...
Философ! Китӧ мем,
И пондам овны нэм,
И мыйӧн овны — эм!»
Философ сылы сідз:
	«Тэ мем пӧ абу колан,
	Кӧн колан, сэн мед олан.
Со ӧні князьтӧ видз:
Тут коньӧр орӧм,
И олӧмсӧ нин ёрӧм,
И тэнӧ бара корӧм...
Кинжалыс сы бӧр лэчтыштӧм,
А морӧсас на зургытӧм»...