КУИМ ЁРТ

Оз вермы уджыс ӧтувтчытӧг пуны,

Кӧть уджалысьыс лоӧ сюсьысь сюсь...

Ёсь пиня Сир да Рак да еджыд Юсь

Бур кӧлуй пыжӧн медасисны нуны.

Пыж нырӧ найӧ кӧрталісны гез,

Кыдз татшӧмторсӧ вӧчлывлӧны йӧз,

Дай сэсся горӧдісны: «Вайӧ ӧдйӧ мӧдам!

Ми туйсӧ индавтӧг на тӧдам!»...

Медвойдӧр гезсӧ пиньӧ курччис Сир.

Збой борда Юсь эз виччысь дыр,

Тшӧтш сыкӧд гезсӧ вомӧ босьтіс.

Дерт, коймӧд ёртыс асьсӧ эз нин ляк:

Кык чорыд шыранъяссӧ восьтіс,

Пыж гезйӧ шашаритчис Рак.

Бур кӧлуй нуысьяслӧн лолыс весиг тырӧ,

Да некыдз уджалӧмыс ӧтлаӧ оз усь:

Сьӧд кымӧр улӧ кайӧ еджыд Юсь,

Ёсь пиня Сир став вынсьысь кыскӧ йирӧ;

Тшӧтш мырсьӧ накӧд Рак, медічӧт вок,

Да бӧрӧн мунӧ сылӧн кок.

Пыж нуан уджсӧ куим ёрт эз помав,

Кӧть пыжсӧ эськӧ некод оз на домав.

Он вермы сэтысь тӧдны, кодлӧн мыж,

Да пыр на сэні тыра пыж...