КӦИН ДА ТУРИ

Кыдз олӧ Кӧин, быдӧн тӧдӧ:

Пыр сійӧ ветлӧ, корсьӧ яй.

Кӧть кулӧм ыж, кӧть кукань сылы вай,

Оз бӧрыньт, ставсӧ горшас лӧдӧ;

Мый аслыс сюрӧ, мӧдлы оз нин сет,

Оз некор шулы: ме пӧ талун пӧт.

Сідз ӧти Кӧин лудӧ быд лун воліс,

Зэв уна ыжлысь юліс вир,

Бур йӧзысь омӧлика поліс,

Да ӧтчыд лои горшыс сылӧн тыр...

Вир юысь Кӧин виньдіс ыджыд лыӧн:

Син сувтӧдӧма, паськӧдӧма вом...

Дзик кутіс кувны, оз ков сутшкӧм шыӧн.

«Но, — шуӧ, — воис меным пом!»

Кузь кока Туриӧс руд Кӧин сэки аддзӧ:

«Ак, — шуӧ, — муса вок,

Ме лыӧн виньді! Отсав меным лок!

Вай лысӧ кыскы... Волы, волы татчӧ...

Лы кыскӧмсьыд ме сета тэныд дон!

Ог ылӧд, доныс лоӧ ён!»

Кузь кока Тури нюрысь кутіс петны:

«Дерт, позьӧ, — шуӧ, — отсӧг тэныд сетны.

Ме некор некодӧс ог йӧрт,

Пыр тэныд отсала, эн бӧрд!»

Руд Кӧин вомсӧ восьтіс, ружтӧ-мурзӧ:

«Ой, кула, кула... эн пӧ нюжӧд дыр!»...

Йӧй Тури Кӧин горшас сюйис юрсӧ

Дай лысӧ кыскис пырысь-пыр.

«Но, Кӧин, мынтысь, — Тури пондіс шуны: —

Ме кора тэнсьыд дон!»

Вир юысь Кӧин бара лои ён.

Лы кыскӧм уджыс регыд сылӧн вуні:

«Тэ кысь пӧ локтін? Коді тэ?

Эн горзы... скӧрми ӧні ме!

Тэ, мисьтӧм чужӧм, мыйӧн чайтан менӧ?

Ме эськӧ сёйны верми тэнӧ,

Да талун кыдзкӧ вывтіджык ме бур:

Эг орӧд тэнсьыд юр!

Ме ачым тэныд бурсӧ вӧчи —

Ас горшысь ловйӧн тэнӧ лэдзи!

Мун менам син водзысь да нюртӧ кокнад лой,

Мун, кытчӧдз тэнӧ ме эг сёй!»...

Йӧй Тури пышйис, доныс сылӧн вуні...

...Тан со мый колӧ Туриыслы шуны:

«Эн кытчӧсюрӧ юртӧ сюй —

Лёк Кӧинъяслы отсавны оз туй!»...