КОМ ДА ГЫЧ

 

Сӧдз визув ваын ичӧтик да том

Зэв бура оліс тэрыб Ком.

Эз сійӧ дышӧдчы, эз куйлы,

Пыр ветліс, корсис гажаин,

Сьӧд няйтӧ нырсӧ эз на сюйлы,

Эз шулы лёкысь кыв ни джын.

Том ичӧт Комлӧн мича вӧлі нырыс,

Эз дурка овлы тэрыб Ком.

Да ӧтчыд кыдзкӧ тыӧ сійӧ пырис;

Дай шензьӧмысла восьтіс ассьыс вом.

Мый аддзис Ком? Зэв гудыр вӧлі сэні.

Оз вӧрзьы ва, оз визувт, гӧгӧр няйт.

«Но, шуӧ Ком, ме татысь ӧні

Бур олӧм ог нин чайт!»

«Эн горзы! — кодкӧ шуис сылы воча, —

Эн пальӧд узьысьяслысь ун!

Ми тані ставным узям вой и лун!

Ми весиг вӧрзьӧдчывлам шоча!»...

Оз аддзы Ком,

Кысь сёрни кылӧ, кодлӧн вӧрӧ вом,

Дай юалӧ: «Тэ коді?

Тэ, гашкӧ, паськыд Ёді?»

Сэк сёрнитысьыс висьтасьӧма сідз:

«Ме абу Ёді, енмӧй видз!

Ме — пӧрысь Гыч. Ме баксявтӧдз нин олі.

Со менам вокъяс. Ставным куйлам ми.

Сӧдз ваысь татчӧ некод эз на волы.

Эн дӧзмӧдчы, мун татысь, чери пи!»

Том, ичӧт Комлӧн сьӧлӧм пузьӧ.

Зэв ыджыд дивӧ аддзӧ сылӧн син:

Гыч чукӧр няйтӧ сатшкысьӧма, узьӧ,

Дыш висьӧмыс оз мун.

«Эн узьӧ, Гычьяс, садьмӧдчӧ да чеччӧ! —

Дыш черияслы горзӧ тэрыб Ком: —

Вай пальӧдчӧ да мӧдӧдчамӧй сэтчӧ,

Кӧн воӧма нин пемыдыслы пом!

Сэн югыд, гажа. Лӧсьыд сэні овны.

Сэн ваыс сӧдз.

Збой визув сэтчӧ гудырсӧ оз лэдз.

Сӧдз ва пиас лёк Сирысь оз ков повны.

Эн куйлӧй дыр,

Вай чеччӧ пырысь-пыр!

Сӧдз васӧ корсьны оз ков мунны ылӧ:

Со тасянь шургӧм сылӧн кылӧ!»...

Том велӧдысьлӧн шуӧм вӧлі бур,

Да ӧти Гыч эз лэпты юр.

Дыш черияслы муса вӧлі няйтыс.

Сэк пӧрысь Гыч став Гычьяс пыдди кайтіс:

«Эн велӧд, Ком,

Тэ зэв на том,

Тэ пӧрысьяслы индавны он вермы!

Мун татысь, пет,

Да узьны узьысьяслы сет!

Мун ӧдйӧ, кытчӧдз ме эг скӧрмы!

Мед татшӧм больӧдчысьыд миянын эз вӧв!

Ми гудыринын олам шы ни тӧв!»...

Тадз шуӧм бӧрын пӧрысь Гычлӧн нырыс

Сьӧд няйтад пыдӧджык на пырис...

Дерт, кодлы муса няйт да пемыд лун,

Выль олӧм корсьны сійӧ оз нин мун...