СЬЫЛЫСЬ МЕЖ

Ыж чукӧр шӧрын ветліс шырӧм Меж.

Зэв вӧлі ачыс ыджыд сюра

Да тыртӧм юра.

Пыр сылӧн раминика легис ичӧт бӧж.

Сідз, гашкӧ, кувтӧдз эськӧ лои овны-вывны,

Да кыдзкӧ ӧтчыд шуис сылы Порсь:

«Тэ, Межук, бура кужан сьывны,

Мӧд татшӧм сьылысьтӧ он корсь!»

Пыр тшапмис Меж: «Ме ачым тӧда тайӧ!

Дерт, ме кодь сьылысьыд оз некысь сэсся сюр!

Ме сьылӧмнад став ыжтӧ лэпта райӧ!

Ме сьылысь вывті бур!»

Мый лои водзӧ? Межук восьтіс вомсӧ

Дай горӧдіс: «Гид гажӧдысьыд — ме-э!»

Да сэсся помтӧг кутіс сьывны: «Бе-э!»...

Став ыжсӧ шызьӧдіс — и пӧрысьсӧ, и томсӧ.

Кык ыжлӧн шензьӧмысла сувтіс весиг бӧж,

Кор баксӧм лэптіс сьылысь Меж.

Быд гидын гажа. Межук сьылӧ-горзӧ,

Ыж чукӧр водзын чеччалӧ да ворсӧ,

Бӧр кокнас йӧктӧ, вежыньтлывлӧ юр:

«Ме збыль пӧ сьылысь бур!»

Ыж чукӧр ошкӧ: «Аттӧ кутшӧм лӧсьыд!

Кысь бара велӧдчин тэ сьывны сьыланкыв?

Кӧть тэнад ёна киссьӧ пӧсьыд,

Эн ланьтлы, Межук, сьыв!»

«Ме тіянлы кӧ сьӧлӧм вылӧ воа,

Дерт, сьылӧмысь ог дугды! — шуис Меж. —

Ме, тӧдӧмысь, медыджыд сьылысь лоа!

Ог ланьтлы олан чӧж!»...

Пыр сэсся Межук ӧні сьылӧ,

Зэв ылӧ баксӧм сылӧн кылӧ,

Зэв збоя легӧ сылӧн бӧж.

Быд ыжлы муса сьылысь Меж.