БУРЛАК МОРТ
Эз вӧв Ӧльӧ полысь сьӧлӧма,
Эз вӧв сійӧ омӧль зон.
Бурлак костын сійӧ вӧлӧма
Медся удал, медся ён.
Ошкӧс ӧтнас сійӧ кыйлывліс;
Вӧрын некодысь эз пов;
Уна урӧс тӧлын лыйлывліс,
Уна ручлысь босьтліс лов.
Нывъяс Ӧльӧ йылысь шулісны:
«Кутшӧм зонмыд тайӧ бур!»
Чӧскыд суръяс сылы пулісны,
«Мед пӧ гажмас сылӧн юр».
Юліс Ӧльӧ, «аттьӧ» висьтавліс,
Йӧктіс, сьыліс сьыланкыв.
Мукӧддырйи сурсӧ кисьтавліс:
«Мем пӧ веськодь татчӧс ныв!»...
Нывъяс ропкӧдчисны жугыля:
«Некод абу сылы шань!
Гашкӧ, порсь кодь, мисьтӧм бугыля
Колӧ сылы муса ань!»...
Ӧльӧ нывъяс вылын сераліс,
Найӧ скӧрмӧмысь эз пов,
Зіля уджаліс да вӧраліс:
«Мем пӧ мусук оз на ков!»...
Татшӧм сёрни регыд помасис.
Вежсис Ӧльӧ, лои мӧд.
Ачыс, тар моз, лэчкӧ домасис —
Кыдзи домасис, оз тӧд...
Ӧтчыд праздник вылын вӧлӧма
Ягдор сиктын бурлак морт.
Сэні Настук биа сьӧлӧма
Пурттӧг вундіс сылысь борд.
Вӧлі Настук гӧгрӧс чужӧма,
Еджыд, мича, ачыс шань,
Сьывны, гажӧдчыны кужӧма...
Аддзис Ӧльӧ муса ань!
«Мед нин Настук оз кут норасьны, —
Шуис аслыс удал зон: —
Муна сы ордӧ ме корасьны,
Сійӧ тӧдӧ менсьым дон!»
Настук шуис: «Мыйла тэрмасян?
Мыйла вылӧ лэптан юр?
Кӧть и ошъяскӧд тэ вермасян —
Гашкӧ, тэныд ме ог сюр!»...
Чуймис Ӧльӧ, садьтӧг повзьӧма,
Кытчӧ воштысьны — оз тӧд.
«Но пӧ, олӧм менам овсьӧма,
Настук ме сайӧ оз пет!»...
Дугдіс нывъяс вылын серавны,
Раммис Ӧльӧ, бурлак морт,
Пондіс дышапырысь вӧравны,
Мустӧм лои сылы горт.
Водӧ, чеччӧ, мыйкӧ уджалӧ —
Настук Ӧльӧлӧн оз вун.
Рытнас Ягдор сиктӧ вуджавлӧ,
Некор мӧдлаӧ оз мун.
Локтас, Настук вылӧ видзӧдлас —
Со и ставыс сылӧн мог.
Гажмас, сьӧлӧм вылын личӧдлас,
Сэсся бара лоӧ шог.
«Аттӧ, шогӧй, гажтӧм олӧмӧй!
Некор татшӧм ме эг вӧв!
Аттӧ, Настук водзын полӧмӧй!» —
Шуліс Ӧльӧ уна пӧв.
Сьӧлӧм куслӧ, сьӧлӧм ӧзйывлӧ,
Бурлак мортлӧн висьӧ лов...
Дона козин нывлы вӧзйывлӧ —
Козин Настуклы оз ков!
Быд лун локтӧ, быд лун корасьӧ —
Оз и кывзы мича ныв!
Сьӧкыд олӧм вылӧ норасьӧ —
Настук сералӧ, оз кыв!...
Тадзи овны эз кут вермыны,
Дӧзмис Ӧльӧ, удал зон,
Пондіс Настук вылӧ скӧрмыны,
Бара лои важ моз ён.
«Тырмас Ягдор туйсӧ талявны,
Мед оз тувччыв татчӧ кок!
Кута уджалӧмӧн палявны,
Кувтӧдз Ягдорӧ ог лок!»
Мича нывлы синмас горӧдіс
Бурлак Ӧльӧ сэтшӧм кыв,
Ассьыс шогсӧ шӧри орӧдіс...
Коли ӧтнас мича ныв.
Ланьтіс Настук, жугыль лоӧма,
Оз нин серав, тупкис вом.
Мый нӧ тайӧ? Збыль тай воӧма
Зонкӧд тӧдмасьӧмлы пом!
Збыль тай бурлак Ӧльӧ скӧрмӧма,
Збыль тай эновтіс, оз лок...
Шогсьӧ Настук, ачыс йӧрмӧма.
Висьны кутіс: ок да ок!
Быд вой бӧрдӧ, юрлӧс кӧтӧдӧ,
Оз и узьлы мича ныв.
Сэсся юӧр зонлы мӧдӧдӧ,
Гижӧ сылы сэтшӧм кыв:
«Прӧстит, верман кӧ тэ прӧститны,
Важсӧ вунӧд, муса зон!
Волы Ягдор сиктӧ гӧститны...
Донаторйӧй, локтан он?»
Бурлак Ӧльӧ эз куж лёкавны,
Бара пузис сылӧн вир,
Локтіс, нылӧс пондіс окавны,
Би моз ӧзйис пырысь-пыр...
...Оз ков сьӧлӧм сылы косьтыны,
Коді мича, коді том!
Колӧ туйсӧ сылы восьтыны...
Сэсся сьыланкывлы пом!
