




ЛЁК КЫМӦРЪЯС
Вӧр сайысь надзӧник кымӧръяс кайӧны.
Кысь бара локтӧны? Мый найӧ вайӧны?
Киссяс-ӧ на пиысь небыдик зэр?
Усяс-ӧ лёк ногӧн му вылӧ шер?
Кымӧръяс ыдждӧны, паськыдджык лоӧны,
Шондісӧ тупкӧны, матӧджык воӧны.
Кытчӧкӧ вошӧма, ланьтӧма тӧв.
Дугдӧма йирсьӧмысь, сулалӧ вӧв.
Туй вылын баляяс баксӧны, шогсьӧны;
Коз улӧ чикышъяс дзебсьӧны, ноксьӧны;
Жугыля копыртіс шепъяссӧ сю;
Бадь костын букыштчис, пемдӧдчис ю.
Мужикъяс, бабаяс гортаныс пырӧны;
Купайтчысь челядьяс вадорысь бырӧны.
Кымӧръяс локтӧны повзьымӧн сьӧд.
Мый бара лоас-а, некод оз тӧд.
Воисны кымӧръяс, сувтісны ӧтлаӧ.
Эз на тай, майбырӧй, лэбзьыны мӧдлаӧ.
Садьмӧдчис, лолыштіс ю сайысь тӧв,
Туй кузя пӧльыштіс чорыда зэв.
Лэптысис лыаыс матісянь, ылісянь.
Биӧн моз, сявкнитіс вӧр вылӧ вылісянь,
Лыйигмоз гымыштіс. Тіралӧ му.
Тоньгӧны ӧшиньяс, копрасьӧ пу.
Тшӧкыда, тэрыба зэр кутіс киссьыны,
Зэр ваӧн керкаяс пондісны мыссьыны.
Вежӧдіс йӧръясын пуктаслӧн кор.
Вадорлань котӧртны мӧдӧдчис шор.
«Бура тай зэрмӧма!» — мужикъяс шуӧны.
Бабаяс зэр улӧ шомӧсъяс нуӧны.
Ӧшиньсӧ восьтӧма, видзӧдӧ пӧч:
Оз-ӧ пӧ ен биыд омӧльсӧ вӧч?
Бара на чардыштіс... кымӧръяс югдісны...
Бабаяс шомӧснас котравны дугдісны...
Гымалӧ, уалӧ. Лэбалӧ би.
Пернапас чӧвталӧ пӧчӧлӧн ки.
Пӧрысьлӧн повзьӧмла кынӧмыс оръялӧ.
«Мый бара юрбитан? — пи сылы горалӧ:
Веськыда висьтавны, юрбит кӧть эн,
Оз вермы отсавны абутӧм ен!»
Кӧсйис на пӧчӧыс лӧсьыда шензьыны,
Кӧсйис на пиыскӧд усьтӧдзыс вензьыны,
Сӧмын эз удит на паськӧдны вом —
Шензьӧмлы-вензьӧмлы воис нин пом.
Ӧшиньӧ анькытш моз шер кутіс сяргыны,
Стенъяскӧд, вевтъяскӧд сёрнитны-варгыны...
Лёк ногӧн шурӧбтіс, шутёвтіс тӧв,
Кытыськӧ нетшыштіс, шыбитіс пӧв...
Гудыртчис ывлаыс... Мый бара лоӧма?
Медбӧръя луныд тай, буракӧ, воӧма:
Идъяссӧ, сюяссӧ жугӧдӧ шер,
Роскӧн моз чышкалӧ картупель йӧр.
Йиторъяс усьӧны, муяссӧ нырӧны,
Стеклӧ пыр, ворсігтыр керкаӧ пырӧны,
Вӧчӧны быдӧнлы зэв ыджыд шог.
Абу тай шерыслӧн бур оланног!
* * *
Мунісны кымӧръяс, дугдісны лёкавны;
Дугдісны йиторъяс няньяссӧ кокавны.
Бара нин енэжыс пасьтала лӧз.
Жугыльтчис чорыда уджалысь йӧз.
Томлӧн и пӧрысьлӧн сьӧлӧмыс повзьӧма.
Аддзӧны войтыръяс, олӧмыс овсьӧма:
Мый вӧлі кӧдзӧма — нинӧм эз ло!
Воис тай, буракӧ, тшыгъялан во...
Гым шыыс муртса на кылыштӧ ылісянь.
Шондіыс важ моз нин югъялӧ вылісянь.
Пемдӧдчы, шондіӧй, син водзысь мун:
Шог дырйи нинӧмла шондіа лун!
Пӧтлунсӧ гӧрысьлысь кымӧръяс нуисны.
«Шуд миян вошӧма!» — мужикъяс шуисны.
Мӧд ногӧн кутіс нин шензьыны пӧч:
«Мыйла нӧ енмыд пӧ бурсӧ оз вӧч?»