ВӦЛЯ

Мем зарни вӧльнӧй олӧм муса,

Кӧть менам оланіныс — чом...

Ме, сотчӧм сись моз, сэки куса,

Кор воас вӧляыслы пом!

Ме чомйын ола, муса вокъяс!

Зэв гажа овны сэні мем.

Ог некор аддзывлы ме шогъяс,

Кор зарни вӧля менам эм!

Ме кужа вӧля вылын овны,

Мем сэтчӧ велӧдчӧм оз ков...

Ме дугді озыръясысь повны,

Ме ӧні на улын ог ов!

Ме ӧні абу пемыд юра,

Ме тӧда уна-унатор...

Ме дзескыд чомйын ола бура,

Вит судта керка ме ог кор!

Вит судта керка шог оз личӧд,

Ас чомйысь сэтчӧ ме ог мун...

Ме ачым ыджыд, ачым ичӧт,

Мем муса вӧльнӧй югыд лун!...