СӦВЕТ ВЛАСЬТ КОКНЬӦДӦ КРЕСТЬЯНАЛЫ

Неважӧн ме лэччылі могӧн Сыктывдінкарӧ. Лэччигӧн вӧлі зэв шогся, мися, шойччыныд сувтныд некытчӧ лоӧ карад да. Туй вылын нин меным висьталісны, эм пӧ карын «Крестьяна керка». Сэтчӧ пӧ позьӧ шойччыны пырны, весиг пӧ некутшӧм дон оз босьтны.

Сыктывдінкарад вои да муні «Крестьяна керкаад». Позяс оз, мися, тані шойччыны — юала. Позяс пӧ бара — шуӧ заведующӧйыс: мун пӧ лэдзав вӧвтӧ да гидняас сюй, а ачыд пӧ вот тайӧ вольпась вылас узян, — индіс меным вольпась. Вольпась вылас полан и водныс, мед оз няйтӧссьы, сэтшӧм сӧстӧм еджыд прӧстыняыс да юрлӧсыс.

Рытнас сэсся ломзис электричество, локтіс заведуйтысьыс морт мӧдкӧд. Найӧ вайисны нигаяс, газетъяс да кутісны висьтавлыны висьӧмъяс йылысь да мый да.

Ёна и дивуйтчи ме та вылӧ: аттӧ зонмӧ, мися, войдӧр карад локтан да, пыр полан чирыштӧмысь, а ӧні Сӧвет власьт дырйиыд нарошнӧ крестьянаыдлы шойччан керкаястӧ вӧчалӧны.

Сӧмын, ме ногӧн кӧ, эмӧсь на тырмытӧмторъяс. Ӧти-кӧ, некӧн туй йӧзлы косьтыны тюнияссӧ да паськӧмсӧ; мӧд-кӧ, некӧн шойччысь йӧзлы пусьыны сёян; коймӧд-кӧ, пӧсь ва овлӧ луннас сӧмын кыкысь: рыт-асыв кӧ он веськав, луннад тшайыд абу; сэсся шойччаніныс вылі судтаас. Бурджык эськӧ вӧлі шойччанінтӧ лӧсьӧдны уліас.

Ме надейтча, мый тайӧс регыдӧн ставсӧ лӧсьӧдасны.

Коми крестьянин.