СЫКТЫВКАРСА «КРЕСТЬЯНА КЕРКА»

Сыктывкарын эм Крестьяна керка, мӧд ногӧн кӧ шуны, «шойччан керка». Сійӧс унаӧн на сиктъясысь локтысь крестьяна оз тӧдны. Ветлысь-мунысь кр-на пырӧны узьны-шойччыны карса крестьяна ордӧ, кытӧн узьлӧмысь колӧ мынтыны сьӧмӧн либӧ мукӧдторйӧн, а тулысъяснад, кор зэв унаӧн карӧ чукӧрмылӧны крестьяна, ставыслы узяніныд оз и сюр, сы вӧсна уналы узьлыны лоӧ сэки ывлаын. Кутшӧм нин сэк сэн шойччӧм!

«Крестьяна керка» ӧнӧдз вӧлі зэв гӧлиник: гожӧмнас узьлысьяс узьлісны куш наръяс вылын, а кор ёна уна йӧзыс, узьлісны и джоджас.

Ӧні «Крестьяна керкалы» сетісны 3781 шайт да 70 ур сьӧм. Сійӧ сьӧмӧн унатор нин позьӧ лӧсьӧдны, бурмӧдны «Крестьяна керкаын». Лӧсьӧдӧма нин ӧні пу крӧватьяс, лӧсьӧдалӧны и мукӧдтор. Узьлысьяслы сетсьӧ пӧсь ва, тшайыс асланыс. Тшай вылас ӧні сьӧмыс оз на тырмы. Ветлысь-мунысьяс вермасны пывсьыны; пывсяныс «крестьяна керка» бердас жӧ. «Крестьяна-керка» кутӧм ӧні крестьяна сайын. Кутасны кӧ сэні шойччыны, унджык йӧз кӧ кутасны узьлыны, керка оз тупкыны, а кыдз вермасны кутасны кыпӧдны.

«Крестьяна керка» оз сӧмын узьлӧм йылысь тӧждысь, сійӧ зільӧ ветлысь-мунысь крестьяналы сетны тӧдӧм (знания), видз-му уджалӧм йылысь да мукӧдтор. Мед сійӧ уджыс мунӧ лӧсьыдджыка, колӧ лӧсьӧдны бурджык крестьянскӧй уголок, унджык экспонатъяс ваявны. Гожӧмнас Видз-му уджалан юкӧд эськӧ заводитліс лӧсьӧдны сэтшӧм уголоксӧ, да мыйлакӧ бӧр дугдіс. Весиг ӧні некод оз и волывлы. Колӧ эськӧ помавны жӧ нин Видз-му уджалан юкӧдлы заводитӧм уджтӧ!

Эмӧсь ещӧ уголокъяс: дзоньвидзалун кутан (санитарии) да мамъясӧс челядькӧд доръян (по охране материнства и младенчества). Уголокъяссӧ эськӧ лӧсьӧдлісны гожӧмнас нин, да уджыс некутшӧм жӧ эз мун. Гожӧмнас эськӧ докторӧ велӧдчысьяс зіля босьтчылісны, кӧсйисны уджавны, сӧмын эз удайтчы: крестьяна воӧны удж вылысь — мудзӧмаӧсь, видзӧдчӧны водны шойччыны, мед эськӧ аскинас бара удж вылӧ мунны. Кывзыны лекцияяс гожӧмын найӧ оз вермыны. Сы понда ме шуа: удж нуӧдны «Крестьяна керкаын» медбур тӧлын, кор крестьяна волӧны карӧ оз уджавны, а кутшӧмкӧ могъясӧн. Тӧлыс заводитчис. Рытъяс кузьӧсь. Мыйкӧ колӧ вӧчны. Узьлысьяс корсюрӧ ӧні кызьӧдз кайлӧ. Сідзкӧ позьӧ рытъяснас варовитны волыны агрономъяслы, докторъяслы да мукӧдлы.

Крестьяна керкаын узьліс
юльын	2083 морт.
августын	504 „
сентябрын	938 „
октябрын	930 „
ставыс	4455 морт.

Нёль тӧлысьын со вель уна йӧз нин узьлӧмаӧсь — 4455 морт. Тайӧ арталӧмӧ пырисны сӧмын кодъяс волісны «Крестьяна керкаӧ» 10 часӧдз. Бӧрын воысьяс тшӧтӧ эз сюрны. Ӧні 11 часын игнасям. Гольӧдчӧмӧн позяс вӧзйысьны и сёрӧнджык.

Деревняса крестьяна, локтад карад да пыралӧй «Крестьяна керкаад», сійӧ ӧд асланыд.

А ті, велӧдчӧм ёртъяс, волывлӧй сёрнитны деревняса гӧсьтъяскӧд, велӧдӧй, индалӧй налы бур туйяс.

Н. Ч.