ВЫЙ ВӦЧАН ТӦВАРИЩЕСТВО ЙЫЛЫСЬ

Айкатылаын (Емдін уездын) важӧнкодь нин эм вый вӧчан тӧварищество. Сэні вӧлі 13 шлен, 8 шленыс шӧркоддьӧма олысь крестьяна.

Гӧльджык крестьяна пырны тайӧ тӧвариществоас оз вӧлі вермыны, пыригас пырысьтӧм-пыр колӧ вӧлі мынтыны 12 шайт да (паевӧйӧс да вступнӧйӧс).

Ӧні тӧварищество аслас уджӧн кутіс мунны кооперативъяс туйӧд. Вӧлі неважӧн собранньӧ да, сэні босьтісны шленӧ 16 мортӧс — ставныс гӧль крестьяна пиысь. Паевӧй да шленскӧй взноссӧ шуисны мынтыны уджалӧмсьыс. Войдӧр вӧлі уджалӧ заводын ӧти смена, ӧні кутас уджавны кык смена суткинас.

Ме чайта, ӧні Видз-му Управленньӧ оз кут видзӧдны тӧварищество вылӧ акционернӧй тӧварищество вылӧ моз, кутас видзӧдны вӧчасян кооперативнӧй тӧварищество вылӧ моз (производственно-кооперативное товарищество) дай ёнджыка кутас отсавны сійӧ уджлы.

Сӧмын сэки тӧварищество вермас лӧсьӧдны унджык шабді кӧйдыс, унджык шленъяс заводитасны вӧчны выйсӧ. Тадзиӧн сӧмын крестьяна (тӧвариществоса шленъяс) вермасны лэптыны ассьыныс овмӧснысӧ.

А—а.