КРЕСТЬЯНКА, ЛОК ШКОЛАӦ ВЕЛӦДЧЫНЫ!

Важӧн гырысьясӧс велӧдӧм йылысь весиг сёрни эз вӧвлывлы.

Сы вӧсна важ правительство колис миянлы ыджыд лёк наследство — 26816 велӧдчытӧм мортӧс Коми обласьт улысь. Сійӧ велӧдчытӧмсӧ сӧвет власьт ёна тӧждысьӧ бырӧдны.

Сӧветскӧй правительство, Ленин ёрт шуӧм серти, сетіс срок бырӧдны неграмотнӧй йӧзсӧ Октябр революциялы дас во тыран лун кежлӧ. Дерт, ӧні велӧдчытӧм йӧзыс абу важ мында, ӧні во куим нин велӧдӧны гырысь йӧзсӧ. Таво кежлӧ (лыддьӧм серти) велӧдчытӧм йӧзыс миян обласьтын коли: нывбабаыс 18.510 морт, мужикъясыс 1.570 — тайӧ дас кык арӧсасянь комынӧдз.

Колӧ таво велӧдчытӧм крестьянкаяслы пырны велӧдчыны гырысьясӧс велӧдан школаӧ, пуктыны став зільлунсӧ пемыдлун шыбитӧм вылӧ.

Велӧдчӧмыд восьтас синъястӧ, петкӧдас морттӧ. Сэки омӧльджыка кутасны нартитны мужикъясыд, пемыд бать-мамыд. Быд ногыс ӧд овлӧ: налогъястӧ оз ладӧн сюйны-пуктыны, уна мукӧд ӧшыбка вӧчӧны — овлывлӧ и нарошнӧ. Мунасны нывбабалӧн пияныс, вокъясыс, рӧдвужныс Краснӧй армияӧ либӧ мукӧдлаӧ кытчӧкӧ, ті и письмӧсӧ гижны онӧ кужӧй, ковмас бокӧ петны да кевмысьны, мед эськӧ письмӧтӧ гижасны. Ковмас кӧ кытчӧкӧ гижны заявленньӧ, бара жӧ лоӧ йӧзӧс медавны. Ті кӧ эськӧ вӧлінныд велӧдчӧмаӧсь, эз ков йӧз пыр вӧчны, ставсӧ верминныд вӧчны асьныд. Крестьянкаяслы колӧ таво аслыныс видзӧдны, мед эськӧ гырысьясӧс велӧдан школаясын унджык велӧдчысьыс лоӧ нывбаба.

Ми надейтчам, таво оз ковмы миянлы мырдӧн-сорӧн кыскыны крестьянкаӧс гырысьясӧс велӧдан школаӧ, найӧ мунасны асьныс, став зільлунсӧ пуктасны бура велӧдчӧм вылӧ. Колӧ югдӧдны сӧвет власьтлы Октябрса революциялы дас во тыран лун кежлӧ став велӧдчытӧм нывбабаясӧс.

Виттор Наталь.