КОЛӦ БЫДӦНЛЫ ТӦДНЫ ТӦВАРИЩЕСТВОЯСЛЫСЬ УДЖСӦ

Сельскокӧзяйственнӧй удждысян тӧвариществоын ыджыдъясыс, кӧзяинъясыс лоӧны асьныс тӧвариществоса шленъясыс. Ставныс найӧ асьныс вермӧны бергӧдлыны тӧвариществоса уджнас. Сы вӧсна тӧвариществоас уджнас бергӧдлыны бӧрйыссьӧны шленъяс письыс кымынкӧ морт — правленньӧ.

Колӧ быд мортлы видзӧдны тӧвариществолысь уджсӧ, медым тӧдан сылысь уджалӧм сямсӧ, медым аддзан пырысьтӧм-пыр, кутшӧмкӧ кӧ ӧшыбка сылӧн лоӧ. Он кӧ видзӧд сылысь уджсӧ, вермас тӧвариществоыд сорсьыны уджнас, не веськыда уджсӧ нуӧдны дай медбӧрын вермас путкыльтчыны ставнас.

Устав серти тӧвариществолысь уджсӧ видлалӧ ревизионнӧй комиссия. Комиссияыс бӧрйыссьӧ тӧвариществоса шленъясӧн собранньӧяс вылын. Сэсся тӧварищество уджӧн вермӧны тӧдмасьны, видлавны кооперативъяслӧн союзъясыс. Налӧн тайӧ удж вылӧ лӧсьӧдӧма инструкторъясӧс.

Сӧмын ӧд инструкторъясыд абу на тырмымӧн. Зэв абу лӧсьыд, зэв омӧль лоӧ, тӧвариществоса шленъяс кӧ кутасны надейтчыны сӧмын инструкторъяс вылӧ, асьныс оз кутны видзӧдны да тӧдмасьны тӧвариществоса уджнас. Шленъяс кындзи ӧд некод оз вермы бура да гӧгӧрбок аддзыны тӧвариществоыслысь быд воськовсӧ, быд ичӧтик нелючки уджалӧмсӧ. Быд шлен сэтшӧмтор йывсьыс висьталас ревизионнӧй комиссиялы. Ревизионнӧй комиссия видлалас уджсӧ тӧвариществолысь, веськӧдас нелючки уджалӧмсӧ.

Ревизионнӧй комиссия шленъяслы асланыс собранньӧяс вылын колӧ бӧрйыны сюсь да веськыда уджалысь йӧзӧс, медым найӧ кужӧны вӧлі видлавны тӧвариществоыслысь уджсӧ, медым найӧ пыр вӧлі тӧдӧны, кутшӧм удж мунӧ тӧвариществоас.

Бур ревизионнӧй комиссияӧн, быд шленӧн тӧварищество удж вылӧ ёна видзӧдӧмӧн да кадын нелючки уджсӧ вештӧмӧн, быд шленӧн правленньӧса уджыслы отсалӧмӧн сӧмын ӧдйӧ да бура сувтас тӧварищество кок йылас.