ТАЛУН СЫКТЫВДІНКАРЫН ПРАЗДНИК

Талун Сыктывдінкарын зэв ыджыд праздник.

Ӧти-кӧ, тайӧ праздникыс ыджыд сы понда, мый таво ми вермам тшӧтш став Республикаса йӧзыскӧд нимкодьпырысь шуны: таво ми няняӧсь мукӧд вося серти, таво урожай воис бур быдлаын Сӧвет Республикаын, таво бурджыка олас и овмӧдчас миян крестьянин — мед этша светвывса буржуазия пиньсӧ жерйӧдлас весьшӧрӧ миян вылӧ.

Мӧд-кӧ, талун жӧ Сыктывдінкарын лоӧ выставка. Видзӧдлыны ӧта-мӧдлысь быдтӧм, радейтӧм пуктас-кӧдза, скӧт — миянлы сэтшӧма жӧ колӧ, кутшӧма колӧ и урожай. Выставка вылын ми вермам мыйсюрӧ и аслыным пӧльза вылӧ тӧдны.

Но тайӧ праздниксӧ медъён ыдждӧдысьыс миян — дона гӧсьт, трактор. Дивӧ ӧд, быдтор нин и миянлы, Сыктывдінкаргӧгӧрса крестьяналы, кутіс тырмыны. Кӧрт лэбачтӧ петкӧдлісны, ӧні ён пельпома стальнӧй вӧв нин вайисны. Выставка вылын петкӧдласны: кыдзи тракторыд вартӧ, ытшкӧ, вундӧ, кыскасьӧ, гӧрӧ, пинёвтӧ, кӧдзӧ. Со ӧд! Дерт, мӧдарӧ кӧ, ми тӧдам, другӧн сійӧн уджавны быдӧнлы оз на ло. Но петкӧдлас кӧ ассьыс быдтор уджавны кужӧмсӧ, сэки ми лӧсьӧдны кутам ассьыным олӧмнымӧс да видз-муяснымӧс сідзи, медым эськӧ позьны кутас уна трактор лӧсьӧдны: кутам ӧтувтчӧмӧн овны, уджавны.