ВЕНИБ — КОЙГОРТ ВӦЛӦСЬТЫН

Крестьяна олӧны комсомол дор. Корӧны школа. Исполком омӧля уджалӧ.

Миян сиктын 28 керка. Эм комсомоллӧн ячейка. Уджалӧ ӧні бура. Крестьяна олӧны комсомол дор. Сӧвет власьттӧ ёна ошкӧны. Волывлӧны комсомол собранньӧ вылӧ сёрнияс кывзыны. Крестьяна ёна корӧны школа восьтыны. Миян дорын матын эм ещӧ куим сикт: Ичӧт Вениб, Лукшин дай Паут. Школа восьтыны позьӧ. Водзын школаыс вӧвлі, да ӧні нёль во нин абу.

Койгортса исполком уджалӧ зэв омӧля. Венибса йӧзӧс общӧй собранньӧяс вылӧ оз и корлы. Ӧні вӧлӧма собранньӧ туй вӧчӧм йылысь. Нинӧм эз и тӧдлыны. Бӧрыннас исполком бумага гижӧ: общӧй собранньӧ вылын пӧ шуисны быд мортлы туй вӧчны. Сэсся потшӧс юклігӧн озыр йӧз дышӧдчӧны да потшӧссӧ потшны сюйӧны гӧль крестьяналы, исполком немтор сы йылысь оз вӧч. Поштӧвӧй агентство эм да сійӧ лӧсьыда уджалӧ.

Селькор.