АСЬНЫМ КӦ ОГ ВӦЧӦ — ЕНМЫД ОЗ НИН ВӦЧ

(Гаръяын, Паджга вӧлӧсьт, Сыктыв уезд)

Важысянь нин пӧрысь йӧз пыр мунӧ сёрни: Гаръя сиктын пӧ олӧм крестьяналӧн босьтчас, кор кырӧдас Гаръя улысь «Ыджыд вад». Йӧз ӧні ретивӧсь, мӧвпыштісны да и шуисны: «Кыдзи сійӧ пӧрасӧ верман виччысьны?» Быдӧнлы колӧ, мед эськӧ вад ӧдйӧнджык кырӧ. 1922 воын босьтчисны кырӧдны сійӧс канаваӧн. Уна труд пуктісны. Кык верст саяс эськӧ кодйисны артельӧн канава, да тӧлкыс эз босьт. Эз удитны эштӧдны — канаваыс кутіс тырны. Сідзи и шыбитісны уджсӧ. Пӧрысьджык йӧз и шуӧны: «Кысь нин, ачыс кӧ оз кыр — кырӧдан сійӧс — ен-батюшкотӧг». — Эз бурмы сьӧлӧм йӧзлӧн. Колян 1924 воын, мыйӧн воис миян обласьтӧ нюр косьтысь морт, сійӧ жӧ артельыс корис сійӧс видлыны вадсӧ. Видлӧм бӧрын йӧзыс лӧсьӧдісны, устав серти, нюр косьтан тӧварищество. Сэки тай босьтчис уджыд! Плануйтісны, мерайтісны, арталісны дай кутчысисны уджӧ. Колян во вӧчисны джын уджсӧ. Кутшӧм любӧ йӧзлы лои, кор таво, 7-ӧд лунын юль тӧлысьын, найӧ эштӧдісны уджнысӧ. Чӧлӧй сутки ваыс равзӧмӧн вадйысь петіс, сажень судтаӧн да сажень пасьтаӧн. Вадъяс ваыс вӧлӧма уна. Первой суткинас чині сӧмын 3 весьт. Ӧні став ваыс вадйысь усьӧма нёль аршын. Вад лэдзӧм кузя Сыктылӧ пуктӧма ёна лыа. Лыа бӧжыс чуть абу люкасьӧма мӧдлапӧлас.

Страдна бӧрын тӧварищество кӧсйӧ весыштны ещӧ канава пыдӧссӧ, медым эськӧ кырас ӧстатки ваыс.

Гаръясалӧн вад гӧгӧрас эм зэв ыджыд нюр — Ыбӧдз воӧ. Тӧварищество кӧсйӧ босьтчыны и сійӧс мӧдысь косьтыны.

Волысь.