КОММУНИСТ ПАРТИЯ ДА КРЕСТЬЯНА ЙЫЛЫСЬ

Миян сиктъясын век на коми крестьяна шуасьӧны: власьт пӧ ӧні абу крестьяналӧн, а рабочӧйлӧн да коммунистъяслӧн. Шуӧны: ми пӧ некытчӧ огӧ сибалӧ, мунам пӧ учрежденньӧ дорӧ, да лоӧ кык лунӧдз довъявны. Мый керсьӧ му вылын и вӧлӧсьтын, нинӧм пӧ ог тӧдӧ. Коммунистъясӧс видӧны, чукӧртчасны пӧ найӧ да ставсӧ асьныс и вӧчасны йӧзсьыс гусьӧн, крестьяналысь нинӧм юавтӧг.

Абу, ёртъяс, сідзи. Гашкӧ, мукӧд сиктын ӧні на эм сэтшӧмыс, да ӧд сыысь абу мыжа коммунист партияыд ставнас. Мыжаӧсь ми асьным, асланым гӧгӧрвотӧмла.

Веськыда кӧ шуны, дерт, коммунист партия юралӧ став удж вылас и нуӧдӧ уджсӧ, тшӧктӧ уджавны, кыдз медлӧсьыд да бур. Вот мукӧд сиктса коммунистъяс абу на ставсӧ гӧгӧрвоӧмаӧсь, оз вермыны важ модасӧ шыбитны. Коммунист партия важӧн нин тшӧктӧ быдӧнӧс уджсӧ нуӧдны мӧд ногӧн, бура.

Коммунист партия крестьяна йылысь шуӧ: миян Сӧветскӧй государствоын крестьяна унджык заводъясын уджалысь дорысь. Унджык кӧ крестьяна, ёнджык уджсӧ колӧ бергӧдны крестьяна пытшкӧ. Крестьяна серти жӧ ӧд и пабрик-заводын уджыс мунӧ.

Ми, Сӧветскӧй государствоын уджалысь йӧз, дорамӧ выль олӧм. Выль олӧм дырйи озыр ни гӧль оз ло, ставныс лоӧны ӧткодьӧсь. Коммунист партия кӧ оз понды уджавны крестьяна пиын да крестьяна кӧ асьныс выль олӧмсӧ вӧчны оз кутчысьны, миян нинӧмтор оз артмы. Коммунист партия ӧтнасӧн нинӧм оз вермы вӧчны. Коммунист партия сӧмын индалӧ уджалысь йӧзлы, велӧдӧ найӧс, кыдзи бурджыка да кокниджыка воам сэтшӧм олӧмас. Крестьянатӧг да рабочӧйтӧг коммунист партия оз вермы овны. Коммунист партия олӧ на дор, на вӧсна тӧждысьӧ. Вот мый вӧсна коммунист партия крестьянаӧс корӧ собранньӧяс вылӧ. Собранньӧ вылын крестьянин вермас тӧдмавны, мый вӧчӧ коммунист партия, и вермас висьтавны ачыс, мый колӧ вӧчны сы ногӧн, кыт сылы оз кажитчы.

Коммунист партия ӧні тшӧктӧ бӧрйыны юравны сӧветъясӧ, кооперативъясӧ крестьянаӧс, мед найӧ ёнджыка вермасны уджавны крестьяна пиын да асьныс ёнджыка велӧдчасны выль олӧмсӧ вӧчны. Крестьяниныд локтас аслас бӧрйӧм морт дорад да регыдджык жӧ и вӧчас тӧданатортӧ.

Мукӧд мортыс сералӧмӧн шуӧ: коммунист партияыд пӧ эз понды вермыны уджавны да, сійӧн и крестьянатӧ ӧні быдлаӧ бӧрйӧны. Абу сідзи, ӧні пондіс ёнмыны коммунист партияыд, унджык уджалысь йӧз на дор пондіс овны, накӧд ӧткодь удж нуӧдны. Сы вӧсна и коммунист партияыд партияӧ пыртӧм мортсӧ на бӧрйӧ юралысьясӧ.

Партия тшӧктӧ топыдджыка ӧтлаасьны крестьянакӧд, пыдӧджык на пиӧ пырны.

Н. Чук.