ГЕРМАНИЯСА ДА ШВЕЦИЯСА РАБОЧӦЙЯС КУЗЯ

Мӧскуа. Швецияса да германияса делегацияяс воӧм кузя Краснӧй площадь вылын вӧлі митинг. Дыр на митингсӧ восьтытӧдз площадьыс тыри мӧскуаса пабрик-заводъясысь рабочӧй да роботничаясӧн. Став площадь пасьтаыс тӧлалӧны гӧрд знамяяс роч да немецкӧй гижӧдӧн. Войдӧр германияса делегация пуктіс Ленин ёрт гу вылӧ венок. Сы бӧрын воссис митинг. Рыков ёрт висьталіс чолӧмбыттьӧ германияса да швецияса делегацияяслы став мувылын медводдза рабочӧй да крестьяна республика нимсянь. Рыков ёрт бӧрын висьталіс Бухарин ёрт. Бухарин ёрт шуис, медсьӧкыд воясас пӧ Европаса рабочӧйяс пыр отсавлісны Сӧвет республикаса уджалысь йӧзлы; ми пӧ тӧдам, рытыввыв Европаса рабочӧйяс миянлы кутасны сетны отсӧг и водзӧ. Чолӧмбыттьӧ мӧскуаса рабочӧйяслы висьталіс германияса делегацияысь председательыс Фрейбергер. Миян пӧ ӧні уджыс — водзсасьны став мувывса капиталистъяскӧд. Ӧні кӧ капиталистъяс тіянӧс кӧсйӧны жугӧдны, пӧдтыны войнаӧн, ми тӧдам нин, мый вӧсна. Ми ӧні аддзим — ті збыль вӧтлӧмныд став капиталистъяссӧ.

Швецияса делегация нимсянь чолӧмбыттьӧ висьталіс Чильбум. Сэсся Чильбум сетіс ВЦСПС-лы знамя.