ЗАКОН СЕРТИТӦГ ОЗ ПОЗЬ УДЖАВНЫ

1922 воын на Сӧвет власьт лэдзис декрет. Сійӧ декрет сертиыс, некодлысь некутшӧмтор оз позь босьтны суд шутӧг. Судыс вермас шуны кодлыськӧ босьтны овмӧссӧ либӧ мыйкӧ мында овмӧссьыс сӧмын кутшӧмкӧ уголовнӧй мыж вӧчӧмысь.

Тайӧ закон сертиыс оз на быдлаын вӧчны. Мукӧддырйиыс милициялы суд шуӧм серти сетасны кодлыськӧ самӧкур пуан кӧлуй, мед милицияыс сійӧ кӧлуйсӧ сетас больничаӧ. Милицияыс босьтас, да сы пыдди сетас мӧда-мӧдлы отсасян комитетӧ. Мӧда-мӧдлы отсасян комитетыс бара жӧ вузалас самӧкур пуысьыслы.

Овлывлӧ и татшӧмторъяс: крестьяналысь босьтасны разрешенньӧтӧг вӧдитан охотничӧй ружйӧяс да сетасны мӧда-мӧдлы отсасян комитетӧ. Мӧда-мӧдлы отсасян комитетъяс вузаласны налы жӧ, кодъяслысь босьтісны ружйӧсӧ. Сідзсӧ унаысь вӧвлывлі.

Татшӧмторъяссӧ вӧчӧмыс — абу закон серти вӧчӧм. Сӧвет власьт кыдз-мый вермӧ водзсасьӧ татшӧм уджӧн. Крестьяналы колӧ отсавны дугдыны татшӧм уджсӧ вӧчӧмысь. Быд татшӧм не закон серти вӧчӧмсӧ колӧ висьтавны прокуратураӧ либӧ гижны газетӧ.

Мыйяс нӧ позьӧ босьтны суд шуӧм серти?

Сӧмын сэтшӧм кӧлуй, кодъясӧс государствоыс оз лэдз гражданалы ас ордас видзныс. Шуам, оз позь кутны взорвитчанаторъяс, ён ядъяс, ружйӧяс, револьверъяс разрешенньӧтӧг, быдпӧлӧс войнавывса кӧлуй, спирт, сідз водзӧ.

Босьталӧмторъяссӧ законыс жӧ висьталӧ кытчӧ воштыны. Йӧзыслы колӧ отсавны власьтъяслы не закон серти уджӧн водзсасьны. Сӧвет власьт чорыда кутас водзсасьны законлы паныд мунӧмысь.

С. Тагер.