КРЕСТЬЯНАӦС КОКНЬӦДӦМ КУЗЯ

Гожся удж дырйи крестьяналӧн прӧст кад некор абу, сылы дона быд час. Сійӧ уджалӧ шонді петӧмсянь шонді лэччӧмӧдз. Сӧмын ӧткымын могъяс сійӧс нетшкӧны уджысь. Гожся кадын сылӧн овлывлӧны могъяс кутшӧмсюрӧ учрежденньӧясын, кызысьсӧ волисполкомъясын. Крестьянинлы ковмывлӧ шыасьлыны видз-му скӧтӧн сёйӧмысь, видз межаяс лӧсьӧдӧм йылысь, кулӧм йылысь да чужӧм йылысь висьтавлыны да сідз водзӧ. Сылы удж дырйиыд сэки быть лоӧ кӧкъямыс часӧдзыд виччысьны, да ещӧ учрежденньӧад час-мӧдтӧ мукӧддырйи кутасны. Крестьяниныдлӧн лун джынйыд сідзи и вошӧ.

Крестьяниныдлы эськӧ зэв лӧсьыд вӧлі, веськавны кӧ вермис сійӧ асывводзнад час вит-квайтын. Кӧдзвывса волисполком крестьянаӧс тайӧ боксянь кокньӧдӧм вӧсна лӧсьӧдіс страда дырйи волисполкомын уджавны заводитны квайт час асывсянь.

Кӧдзвывса исполкомлӧн тайӧ лӧсьӧдӧмыс зэв буртор. Крестьяна вермасны висьтавны таысь сӧмын пасибӧ волисполкомын уджалысьяслы.

Колӧ эськӧ и мукӧд учрежденньӧяслы, кытчӧясӧ крестьяналӧн овлывлӧ тшӧкыдджыка могъяс, мыйкӧ вӧчны крестьянаӧс тайӧ боксянь кокньӧдӧм кузя.

В. Фролов.