ГЕНЕРАЛ ФЭН ЮЙСЯН ЧУКСАЛӦ КАПИТАЛИСТЪЯСКӦД КОСЯСЬНЫ

Китайса правительство ыстыліс нота мукӧд государствоса представительяслы став важ договоръяссӧ Китайкӧд вежӧм йылысь (сійӧ договоръяс сертиыс бурыс вӧлі сӧмын мукӧд государствоса капиталистъяслы). Мукӧд государствоса представительясыс сы вылӧ эз сӧгласитчыны.

Ӧні генерал Фэн Юйсян сы кузя ыстіс телеграммаяс пекинса правительстволы, военнӧй да гражданскӧй власьтъяслы, сэсся студентъяс да рабочӧй союзъяслы. Сійӧ телеграммаясас шуӧ: став важ договорсӧ Китайлысь мукӧд государствояскӧд ми тшӧктам вежны. Ме сеті аслым кыв ёнмӧдны ассьым войскаӧс китайса йӧз дор мукӧд государствоса капиталистъяскӧд косясьны. Став китайса йӧзлысь корӧмъяссӧ капиталистъясӧс ми тшӧктам вӧчны. Ми некор огӧ бӧрыньтчӧй, медбӧръя мортӧдз кутам капиталистъяскӧд косясьны китайса йӧзӧс мездӧм кузя.