КАПИТАЛИСТЪЯСЛӦН ВОЙСКАНЫС ЛЫЙЛӦНЫ ОРУЖЙӦТӦМ КИТАЕЧЬЯСӦС

Кантон правительствоса мукӧд государство кост удж нуӧдысь министр ыстіс нота мукӧд государствоса посолъяс старшиналы — Карахан ёртлы, Кантон карын юнь 23-ӧд лунын англияса да францияса войскаӧн демонстрация вылысь китайса йӧзӧс лыйлӧм кузя. Нотаас министрыс юӧртӧ: юнь 23-ӧд лунын Кантон карын вӧлі демонстрация шанхайса рабочӧйясӧс лыйлӧм кузя. Демонстрация вылас вӧліны купечьяс, студентъяс, военнӧй школаясын велӧдчысьяс, рабочӧйяс да крестьяна. Демонстрацияыс вӧлі мунӧ зэв лючки, некодӧс эз вӧрзьӧдлыны. Луннас час куимын кымын демонстрацияыс вӧлі мунӧ англияса да францияса йӧз оланін улич бокӧд. Налӧн уличыс торйӧдӧма зэв паськыд канаваӧн. Кор кыз йӧзыс водзӧ нин мунісны, нинӧм виччысьтӧг найӧ уличасянь заводитісны лыйлыны винтовкаясысь да пулемётъясысь. Йӧзыс повзьӧмысла уськӧдчисны кытчӧсюрӧ. Унаӧс зэв дойдалісны. Ӧнӧдз тӧдмалӧм серти, виӧмаӧсь сё морт саяс.