КИТАЙСА ПРОФСОЮЗЪЯСЛӦН ЧУКӦСТЧӦМ

Пекин. Ставкитайса профсоюзъяслӧн сӧветыс ыстіс телеграммаяс Амстердамса Интернационаллы, Францияса да Чехословакияса профсоюзъяслы. Телеграммаясас висьталӧ пасибӧ сьӧмӧн китайса рабочӧйяслы отсалӧм вылӧ. Сэсся шуӧ — медъён надеяыс пӧ китайса рабочӧйяслӧн капиталистъяскӧд косясигӧн европаса рабочӧйяс вылӧ.

Сэсся ставкитайса профсоюзъяслӧн Сӧветыс ыстіс телеграммаяс англияса профсоюзъяс Сӧветлы дай россияса профсоюз Сӧветын юралысьлы Томскӧй ёртлы. Англияса профсоюзъяслысь корӧ ыстыны Китайӧ делегация, медым найӧ тӧдмасясны Китаяс китайса рабочӧйяссӧ дзескӧдӧмӧн.

Томскӧй ёртлы гижӧны: сьӧлӧмсянь ыстам ыджыд пасибӧ быд ногыс китайса рабочӧйяслы отсалӧм вылӧ. Корам роч профсоюзъяссянь ыстыны делегация Китайӧ. Сійӧ ещӧ нин чорыда ӧтувтас китайса да россияса рабочӧйясӧс.