КУПЕЧЬЯС ЧИНТАЛІСНЫ КОРӦМЪЯССӦ

Ӧтувъя комитет сувтіс паныд, тшӧктіс ассьыс корӧмъяссӧ висьтавны

ПЕКИН. Забастовка лоӧм бӧрти шанхайса рабочӧйяслӧн, студентъяслӧн да купечьяслӧн организацияясыс лӧсьӧдлісны ӧтувъя комитет. Сійӧ комитетыс став шанхайса йӧз нимсяньыс нуӧдӧ вӧлі сёрни мукӧд государствоса представительяскӧд да китайса правительствокӧд.

Ӧні Шанхайӧ воліс китайса правительстволӧн делегация, да шанхайса ӧтувъя комитетсьыс тӧргӧвӧй палатаыс (купечьяслӧн представительясыс) торйӧн кутӧма нуӧдны сёрнисӧ делегацияыскӧд. Сійӧ сёрниын тӧргӧвӧй палатаыс ёна чинталӧма корӧмъяссӧ (требования) ӧтувъя комитетыслысь.

Ӧні ӧтувъя комитетыс ёна сувтіс паныд тӧргӧвӧй палатаӧн сёрни торйӧн нуӧдӧмысь.

Юнь дас кӧкъямысӧд лунӧ Шанхайын вӧлі зэв ыджыд митинг. Митинг вылас вӧліны 80 сюрс морт саяс. Сэні лӧсьӧдісны, медым китайса правительстволӧн делегацияыс мукӧд государствоса представительяслы висьталас корӧмъяссӧ ӧтувъя комитетлысь, а эз тӧргӧвӧй палатаӧн ӧтнасӧн лӧсьӧдӧмъяссӧ.