КАТША ДА РУЧ

Важ коми мойд серти

Джуджыд пу вылӧ Рака вӧчис поз да сэні быдтӧ пиянсӧ. Позсӧ казяліс Руч, локтіс сэтчӧ да горӧдіс Ракалы:

— Эй, пӧрысь выжыв, шыбит татчӧ ӧти пи... Он кӧ шыбит, пусӧ пӧрӧда да ставнысӧ сёя.

Кӧсйис нин Рака шыбитны муас ӧти пи, но сэтчӧ, буретш, веськалі Катша. Сійӧ пуксис орчча ув вылӧ да шуис Ракалы:

— Мыйкӧ тай тэнӧ ставныс шуӧны вежӧраӧн, а тэ дзик бӧб вӧлӧмыд... Ручыс ӧд тэнӧ повзьӧдлӧ. Аддзан, сылӧн чер ни пила абу... Бӧжнас ӧд оз пӧрӧд...

Рака аттьӧаліс Катшаӧс.

Руч, дерт, скӧрмис да быд ногӧн заводитіс видны Катшаӧс:

— Часлы, суклясьысь лов, ме тэнӧ велӧда... Кытчӧ оз ков ныртӧ сюян...

Руч муніс сэтысь, локтіс паськыд эрд вылӧ, водіс да кывсӧ нюжӧдіс: лэдзчысис кулӧм улӧ. Лэбӧ сэті Катша, аддзӧ: тӧдса Ручыд, буракӧ, кулӧма, оз вӧр. Катша пуксис Руч дорӧ, чеччыштіс кынӧм вылас, сэсся юр вылас, — Руч оз вӧрзьы. Збоймис Катша да чеччыштіс небыд кузь кыв вылас. А Ручлы тайӧ и колӧ вӧлі: тшапнитіс сійӧс.

— Ӧнтай, пеж лов, тэ эн сет меным завтракайтны, а ӧні ме тэӧн ӧбӧдайта...

— Муса ручӧ-чойӧ, тэ ёна эн тэрмась... — кевмысис Катша. — Менам яйӧй збыльысь пеж... Татчӧ локтігӧн ме лукйыси помӧй гуын дай куйӧд пытшкын... Вай ме быглясьышта лысваа турун вылас. Сэки лысваыс менӧ мыськас да лоа сӧстӧм...

Ладнӧ. Руч лэдзис сійӧс. Катша быгыльтчис гоз-мӧдысь и мыйӧн мыніс сійӧ лапаысь — жбыр лэбис зорӧд сюръя вылӧ да китш-китш серӧктіс.

Кодныс на пиысь мудерджыкӧн вӧлӧмаӧсь?