МЫЙЛА ПОН ДА КАНЬ ОЗ ЛӦСЯВНЫ?
Важ мойд серти
Коркӧ, ёна важӧн нин, пон да кань ӧтлаын локтасны морт дорӧ да вӧзйысьӧны сылы удж вылӧ.
Морт видзӧдліс на вылӧ да шуӧ:
— Ладнӧ... Ме тіянӧс босьта. Но ті аслыныд бӧрйӧй сэтшӧм удж, мед ті радейтінныд сійӧс да кутінныд зіля уджавны... Ме ачым уджач морт, и дышъястӧ терпитны ог вермы.
И ачыс муніс уджавны.
Рытнас, кор бӧр локтіс гортас, юалӧ налысь:
— Но, вай висьтасьӧй, коді мый талун вӧчис?
Пон видзӧдліс кӧзяин вылӧ да шуӧ:
— Ме ӧшинь увсьыд ручӧс вӧтлі. Курӧгъястӧ вӧлі кыйӧдӧ...
— Но, а тэ мый вӧчин? — юаліс каньлысь.
— Ме шыр кыйи, — раминика шуис кань.
— Ладнӧ... — шуис кӧзяин да сетіс налы ужын: понлы — нянь крӧшкиа шыд тасьті да ещӧ лы, а каньлы кисьтіс блюдйӧ йӧв.
Каньлы лои завидь. А ачыс думайтӧ: «Мыйла кӧзяиныс понсӧ вердіс бурджыка? Нинӧм он вӧч, ачым мыжа... Эз ков ошйысьны, мый шыр кыйи»...
Аскинас бара ставыс разӧдчисны удж вылӧ. Сӧмын каньлӧн делаыс оз ладмы. То ли шыръясыс мудермисны, то ли мый, но лунтырӧн кань эз вермы кыйны ни ӧти шыр. Да ещӧ гӧбӧчыс вӧлі кӧдзыд, и кань ёнакодь кынмис. Рытъявылыс сійӧ кайис паччӧр вылӧ шонтысьны.
Рытнас, ужнайтны пуксигӧн, кӧзяин бара юалӧ:
— Мый нин талун, другъяс, вӧчинныд?
— Ме ыжъястӧ кӧинъясысь видзи... Ёна и мудзи... — вочавидзис пон.
— А ме гӧбӧчын шыръясӧс кыйӧді... Зэв ёна кынми... — шуис кань.
Кӧзяин бара сетіс налы ужин. Понлы — ыджыд тасьті тыр сук рок, ыджыд лы, а каньлы — блюдйӧ йӧв.
— Тэ, пӧди, кань, шыръяснад пӧтін?.. Уна кыйин?
— Ме эг артав, — пӧръяліс кань.
Пон пӧттӧдзыс сёйис да петіс ӧшинь улас керка-сарай видзны. А кань кайис паччӧр вылӧ тшыг нисьӧ пӧт да кутіс думайтны, кыдзи эськӧ кӧзяинлысь водзӧс босьтны. Мыйла сійӧс пон дорысь омӧльджыка вердӧ?!
Войнас сійӧ чеччис да гусьӧник петіс сарайӧ, кӧні узьлісны курӧгъяс.
Асывнас кӧзяин казяліс, мый оз тырмы ӧти курӧг. Сійӧ кутіс видны понсӧ.
— Чорыда жӧ тэ узян, пон! Лёка видзан менсьым овмӧсӧс! Тавой сарайын вӧр вӧлӧма...
— Весьшӧрӧ сідз шуан, кӧзяин, — дорйысис пон. — Войбыд сюръя дорын куйлі, синмӧс эг куньлы... Керка дорӧ некод эз волы!.. А воліс кӧ, ме эськӧ петкӧдлі сылы пуж...
А кань куйлӧ паччӧрын, сӧмын кургӧ.
Вот тадзи найӧ и кутісны овны. Кань — пыр керкаын, шоныдінын, а пон век ывлаын, кӧть кутшӧм кӧдзыд, керка-сарай видзӧ.
Коркӧ ӧтчыд рытнас кӧзяин шуӧ понлы:
— Мыйла тэ, другӧ, ӧнӧдз вӧрсӧ он вермы кутны? Кыдзи вой, сідзи и менам мыйкӧ вошӧ: то ли кринчаысь нӧк, то ли яй кусӧк, то ещӧ мыйкӧ...
— Да, некод, кӧзяин, керка дорад эз матыстчыв... Збыль шуа. А воліс кӧ, ме эськӧ куті сійӧс...
— Но-но! Смотри! — стрӧга шуис кӧзяин. — Меным лёк стӧрӧжыд оз ков!..
Понлы лои зэв ӧбиднӧ. Петіс ывлаӧ да дзебсис кильчӧ пос улас да шуис войбыд не вугыртлыны ни ӧтчыд, а вӧрсӧ кутны...
И вот, кор керкаын ставыс лӧнис, сійӧ кыліс, кыдзи кодкӧ гусьӧникӧн кыссьӧ сарайлань. Пон уськӧдчис эськӧ, кватитіс вӧрсӧ, но сійӧ удитіс чепӧсйыны потшӧс сайӧ. Пон сӧмын чашнитіс сылысь веськыд боксӧ.
Асывнас пон шуӧ кӧзяиныслы:
— Кӧзяин, талун войнас воліс вӧр, а коді, эг вермы тӧдны. Сӧмын ме удиті сылысь веськыд боксӧ чашнитны...
Пуксисны завтракайтны, а каньыд паччӧрын куйлӧ, оз лэччы...
— Мый нӧ, кысульӧ, тэ он лэччы? — юалӧ кӧзяин. — Кынӧмыд оз сюмав али мый?
— Менам кынӧмӧй висьӧ, — норасьӧ кань. — Шыръясӧс, буракӧ, унджык сёйсьӧма...
— Куйлы, инӧ, висян кӧ, — шуис кӧзяин. — Ми мунім удж вылӧ...
И мунісны... Ылӧдзкодь нин мунісны, но кӧзяинлы друг дум вылас уси, мый сійӧ талун эз верд курӧгъяссӧ. Кӧзяин котӧрӧн бӧр локтіс гортас, а сарайысь петӧ кань, вом доръяссӧ нюлӧ. Кӧзяин чуймис, юалӧ:
— Мыйла нӧ талун ӧшинь улын быдлаын чипан гӧн?
— Гашкӧ, руч воліс да, — шуӧ кань. — Сійӧ радейтӧ курӧг яйтӧ...
— А мыйла тэнад чужӧм-рожаыд курӧг гӧнӧсь?
— Пӧдушкаысь, пӧди, сибдісны... Мыссьыны эг на удит...
— А коді нӧ тэнсьыд боктӧ чашнитіс?
— Паччӧр вывсянь лючки чеччышті да дойми...
— Ылӧдлан тэ ставсӧ, — шуис кӧзяин. — Тайӧ тэ вӧлӧмыд гусясян!.. Тэ гусясян, а ме понмӧс мыжала...
И кӧзяин вӧтліс каньсӧ.
Гашкӧ, эськӧ кыкӧн и олісны, морт да пон, но ӧдӧлитны кутісны шыръяс. Ковмис каньтӧ бӧр босьтны.
Сӧмын вот пон ӧнӧдз миритчыны оз вермы сыкӧд. Кор аддзас каньӧс, сылы сідзи и окота чашнитны мӧдар боксӧ, мед дугдіс сійӧ гусясьны.
Та вӧсна и пон да кань оз радейтны ӧта-мӧдсӧ.
Дона челядь, тайӧ важ мойдсӧ меным висьталіс бабӧй на, кор ме вӧлі тіян кодь жӧ ичӧт на.
