МУДЕР КӦЧ

Ми частӧ кывлам, мый пемӧсъяс пиысь кӧч медся полысь, медся бӧб. Но тадзи ме эськӧ эг шу. Ӧтчыд ме аслам синъясӧн аддзылі, кутшӧм збоя сійӧ дорйысьӧ вӧрӧгъясысь да кыдзи сійӧ кужӧ мудеритны.

Кыдзкӧ ӧтчыд ме муна вӧлі вӧрын векни ордымӧд. Сійӧ петкӧдіс менӧ кушинӧ, эрд вылӧ. Вӧлі сёр ар, муртса лымъялыштӧма. Ывлаыс югыд, сэзь, вылын лӧсталіс гожся моз лӧз енэж.

Видзӧдлі вылӧ. Сэні шлывъяліс кык варыш, буракӧ, пара. Ме сувті да вель дыр видзӧді на вылӧ. Друг ӧтиыс на пиысь топӧдіс бордъяссӧ да суніс увлань бадь кустлань: тыдалӧ, кодӧскӧ сэтысь кыйӧдісны да кӧсйисны вӧтлыны сэтысь. Сідзи и вӧлӧма. Куст увсьыс тринькнитіс кӧч, руд паськӧма на, да кутіс тӧвзьыны-лэбны футбол мач моз. Варыш бӧр качӧдчыліс да бара из моз уськӧдчис кӧчыд вылӧ, суӧдіс сійӧс. Ме повзикодь: мися, кӧчыдлы воис пом. Но, вӧлӧмкӧ, он на сійӧс сідз босьт! Кӧчыд ӧдйӧ бергӧдчис мыш вылас да бӧръя кокнас-лапаяснас чорыда тувкис варышыдлы. Варышыд, бордъяснас шпорӧдчиг, быттьӧ шӧйӧвоши, вешйыштіс бокӧ, а кӧчыд уськӧдчис тӧвзьыны водзӧ. Варышыд бара уськӧдчис сы вылӧ, суніс, но эз веськав: кӧчыд друг сяммис чеччыштны бокӧ, и тайӧ мездіс сійӧс варышлӧн лэчыд гыжъясысь.

Ме лов шы кутӧмӧн видзӧді на вылӧ, мый лоӧ водзӧ. А отсавны нинӧмӧн ог вермы, весиг ружьеӧй абу. Чайтанныд, мый сэсся лои? Видзӧда да кӧчыд тӧвзьӧ мелань. Локтіс ме дорӧ да месянь неылӧ пуксис. А варышыс качис вылӧ, пӧлыс дорӧ, коді век на шлывъяліс сынӧдас. Морт дінад, буракӧ, эз лысьт уськӧдчыны кӧчыд вылӧ. Ме сулалышті ещӧ недыр да мӧдӧдчи водзӧ. Недыр мысти видзӧдлі мыш вылӧ, — видзӧда, кӧчыд тапиктӧ ме бӧрся.

Ме сувті. Сійӧ сувтіс. Ме мӧдӧдча... И сійӧ мӧдӧдчас. Тадзи ми воим вӧр дорӧдз. Но мыйӧн вӧр дорышӧдзыс коли воськов комын, кӧчыд тювыштіс вӧрас, быттьӧ эз и вӧвлы.

А варышъяс эновтісны кӧчтӧ, да кытшъяс вӧчаліг, качисны сынӧдас пыр вылӧджык и вылӧджык...

Со, кыдз, челядь, овлӧ, а ті шуанныд, мый кӧч пӧ полысь пемӧс.