ТУРИ

Ме пукалі Мизин берег дорын да любуйтчи арся ывла вывнас. А ывлаас вӧлі лӧнь, ыркыд. Сэзь лӧнь енэжас ӧшаліс кӧдзавны удитӧм нин гӧрдоват шонді. Ме видзӧдлі вывлань и друг аддзи лӧз енэжсьыс тури. Сійӧ выліті лэбис ӧтнасӧн да корсюрӧ жугыля горӧдлывліс ассьыс песня — «курлы-курлы!» Сылӧн жугыля горзӧмыс кажитчӧ ыджыд дойӧн, йиджис став вӧр-ва пытшкӧсас, йӧз сьӧлӧмӧ.

Мый сійӧ горзіс? Код тӧдас. Гашкӧ, чуксаліс ёртъяссӧ, кодъяс колисны сійӧс, гашкӧ, ассьыс пӧдругасӧ, гашкӧ, норасис кольӧм гожӧм вылас? Мыйла сійӧ колис ӧтнасӧн? Мыйла сійӧ петіс кузь туйӧ сёрӧн? Та йылысь некод оз тӧд да и оз кутны тӧдны.

Мича да тшап лэбачӧй, ме тэныд друг, сиа тэныд став бурсӧ:

— Лэб, донаӧй, лэб! Ставыс лоӧ бур, сӧмын лэб!