МИЧА СЕРПАС

Со и бара коли гожӧм. Ӧні сӧмын казьтывны кутам сійӧс, гожся сӧстӧм вӧр-васӧ, налысь мичсӧ да лышкыдлунсӧ. Дона друг, ми тэкӧд частӧ вӧлім вӧрас, любуйтчылім сійӧн. Эн дышӧдчы, бара волы татчӧ да ӧні пыралам арся вӧрас, сентябрь тӧлысся ӧти лунӧ. Ті аддзыланныд кӧ, ёна чуйманныд, кыдзи сійӧ ӧні вежсис. Гӧгӧр чӧв-лӧнь, оз нин гожся моз дзользьыны лэбачьяс, — найӧ шойччӧны, дасьтысьӧны ылі туйӧ. Пуяссӧ гӧгӧр быттьӧ мавтӧма мича-мича небыд да шоныд краскаясӧн. Локтысь арыс быд пулы козьналӧма паськӧм. Медся мича, пӧжалуй, ловпу. Сылысь гырысь да паськыд коръяссӧ арыс мавтӧма и виж, и вижовгӧрд, и пемыдгӧрд, и гӧрд да ещӧ мукӧд пӧлӧс рӧмӧн. Видзӧдан да кажитчӧ, мый сійӧ абу пу, а уна пӧлӧс лэбачьяс лэбӧны да ӧшйӧмаӧсь сынӧдас.

Пипу ыпъялӧ-сотчӧ югыд гӧрд рӧмӧн, быттьӧ сы увъяс вылӧ пуксьӧма мойдын воӧм жар-птица.

А кор тэ пыран кыддза раскӧ, тэнад син водзӧ сувтӧны зарни платтьӧа мича нывъяс. Шонді югӧрысь зарни коръясыс ставныс дзирдалӧны. Видзӧдан на вылӧ, и найӧ вӧрзьӧдӧны тэнсьыд сьӧлӧмтӧ асланыс чӧв-мелілуннас, мичнас. Коръясыс ньӧжйӧ-ньӧжйӧ вашкӧдчӧны ӧта-мӧдыскӧд, ӧткӧн-ӧткӧн гылалӧны муас да шебрӧдӧны мусӧ мича эшкынӧн.

Пожӧмъяс да кыдзьяс костӧд тыдалӧ пелысь пу, кодлӧн чим гӧрд коръясыскӧд орччӧн ӧшалӧны гырысь алӧйгӧрд розъяс. Мича серпас!

Тэныд кӧ окота тӧдмавны, кутшӧм пуяс быдмӧны вӧрас, оз ков видзӧдлыны вылӧ, пуяс вылас. Видзӧдлы муас, коръясыс асьныс висьталасны.