РАКА СЕМЬЯ

Вӧрысь локтігӧн ме кежи кыддза раскӧ, коді вӧлі сиктсянь неылын. Шы ни тӧв. Раскын лӧнь. Сӧмын менам Черныш понйӧй ветлӧдлӧ-шарӧдчӧ водзын. Друг ме вылӧ уськӧдчисны кык рака. Найӧ лэбалісны юр весьтті, — сійӧ и виччысь — кокыштасны синъястӧ. Ме лэпті киясӧс да куті ӧвтчыны киясӧн. Черныш ветлӧдліс месянь неылын водзын да мыйкӧ исасис-корсис турун письыс. Ракаяс уськӧдчисны сы вылӧ. Мый нӧ тайӧ? «Сэні мыйкӧ налӧн эм!..» — думышті. Ме босьті кос ув да матыстчи Черныш дорӧ. Вӧлӧмкӧ, турун пиас сайӧдчӧма ракаяслӧн пиыс. Сійӧ пукалӧ сэні йӧжгыльтчӧма, вомсӧ паськӧдлӧ. Ме ӧдйӧджык нуӧді Чернышӧс сэтысь. Регыд мысти ракаяс ланьтісны.

Лун дас кымын мысти ми бара паныдасим тайӧ рака семьяыскӧд. Ракапиыс сэки збоя нин чеччаліс му вывті, зілис, буракӧ, кыпӧдчыны сынӧдӧ, но пока оз вермы. А батьыс да мамыс пукалісны пу йылын, видзӧдісны пиыс вылӧ да небыдика кравзісны, — ошкисны, ышӧдісны пинысӧ. Ми кежим бокӧджык, мед не повзьӧдны найӧс.