КОРТӦМ ГӦСЬТ
Арыс таво вӧлі мича, кос. Гашкӧ, сы вӧсна и тшак-вотӧсыс вӧлі этша. Ӧтчыд, кутшӧмкӧ шойччан лунӧ, локтіс карысь менам важся другӧй да шуӧ:
— Тшактӧ, пӧди, уна нин солалін?
— Уна не уна, а мыйтакӧ мында солалі и косьті. Тэныд тырмас-и...
— А тӧдан мый? — друг вежис сёрнисӧ Андрей. — Вай войколӧн кайлам Мизин йылӧ ком вугравны. Поводдяыс мича...
Ме, дерт жӧ, эг ӧткажитчы. Мизин йылас во-мӧд нин эгӧ кайлӧй. Андрей петіс аслас «жигуль» дорас, а ме сӧвті ноп. И час джын мысти ми вӧлім нин туйын. Лун шӧр гӧгӧр вӧлім места вылас.
Машинасӧ колим туй бокас, а асьным босьтім вугыр шатинъяс да лэччим берег дорас. Ветлӧдлім берег пӧлӧныс, корсим бурджык места, но быдлаын вӧлі ӧткодь и бӧр локтім воддза местаас, машина дорӧ матӧджык.
Вуграсим вель дыр, вежлалім местаяс, но мыйлакӧ талун комыс эз ворс, омӧля босьтӧ да ёна мынласьӧ. Босьтны кутіс сӧмын рытъявылыс. Ми другкӧд лэптім нин весьтся кузьджык комын кымын чери.
— Тырмас талун кежлӧ, — шуис Андрей. — Аски бара луныс воас... Вай, другӧ, тэ биась да пусьы, а ме кытшовта матігӧгӧр вӧртіыс.
Сійӧ машинасьыс босьтіс ружье, кӧрзина да муніс, а ме берег дорас биаси. Регыд мысти вӧлі нин дась комысь юква, чай. Лӧсьӧді «пызан», — шӧралі нянь, перйи нопйысь лук, сов, переч, чай юны восьті сук йӧв консерв банка. Бокӧджык, мыр вылӧ, пукті транзисторнӧй приёмник, «Маяк» сетӧ вӧлі концерт. Дженьыда шуны, ӧбед вылӧ вӧлі ставыс дась.
А Андрей век на абу. Сійӧс виччысигмоз, ме бӧр лэччи берег дорас да заводиті вуграсьны. Чериыс век на босьтіс. Гоз-мӧдӧс ме шыбиті нин берегӧ. Ме сідз ылалі комнад, мый эг сразу кыв берег дорын кодлыськӧ ноксьӧм. И друг ме бергӧдчи, и юрсиӧй менам сувтіс: бипур дорын кӧзяйничайтіс ыджыд ош. Сійӧ пӧрӧдӧма ведра, кӧні вӧлі кыйӧм чериыс, унджыксӧ сёйӧма, сӧмын ӧткымын туплясисны бокын. Няньсӧ мыйлакӧ абу сёйӧма, а банкаысь нюлӧ вӧлі юмов сук йӧв.
Повзьӧмысла ме пыри ваас (шуд вылӧ юыс абу джуджыд) да кӧсъя горӧдны, но гӧлӧсӧй вошӧма, оз пет. Ас кӧсйытӧг ме копыртчылі да васьыс перйи кулак кодь из да мыйлакӧ лыйи сійӧс ошкыслы, но эз веськав, ош дорӧдзыс изйыс эз во. Пармаса кӧзяин сэки видзӧдліс ме вылӧ, нюлыштіс вом доръяссӧ да матыстчис приемник дорӧ, кысянь кыліс музыка. «Мыйся ещӧ дивӧ тайӧ?» — думыштіс кӧнкӧ сійӧ. Сэсся видзчысьӧмӧн исаліс тӧдтӧмторсӧ да нырнас веськалі «громкость» ручкаӧ. Приёмникын гора брунгис рок-музыка и ош чеччыштіс чуть бокӧ. Сэсся сылы, буракӧ, лои яндзим аслас повзьӧмысь, друг равӧстіс да лапанас сетӧбтіс приёмникас, да сідзи сетӧбтіс, мый транзисторыс, гартчигтыр, лэбис да шлёпкысис Мизин юӧ. Ош сулалыштіс недыр, и кор гӧгӧрвоис, мый сылы тӧдтӧм зывӧк шыясыс оз нин кывны, мурзігтыр муніс аслас туйӧд.
Регыд мысти локтіс Андрей. Кор ме висьталі лоӧмтор йывсьыс, сійӧ сӧмын сераліс. Со ӧд кыдзи овлӧ...
