ЧЕРИ КЫЙЫСЬ КАНЬ

Ме ветлі Шорсай отделениеӧ и гортӧ мӧдӧдчи Мизин берег пӧлӧн. Локті важ перевоз дорӧдз и сэні син улӧ усины кык детинка, — найӧ вуграсисны. Детинкаяс дорын пукаліс ыджыд руд кань. Вугыръясыс вӧліны ваын, шатинъяссӧ сатшкӧмаӧсь берегас, а асьныс мыйкӧ зэв ёна варовитӧны, весиг оз видзӧдлывны табъяс вылас. Челядь эз казявны, кыдзи ме локті берег дорас, пукси сэтчӧ, ӧзті сигарет да куті видзӧдны налӧн табъяс вылӧ. Меным интереснӧ вӧлі тӧдны, эм-ӧ тані чериыс. Друг ӧти табйыс кутіс вӧйласьны, но детинкаяс оз видзӧдны сы вылӧ, оз казявны. А каньыс, коді пукаліс на дорын, синсӧ вештывтӧг видзӧдіс ваас. Мыйӧн табйыс кутіс вӧйласьны, каньыс чеччис, сувтӧдіс бӧжсӧ да кутіс ниртчыны ӧти детинкаыслы кок дорас да видзӧдны на вылӧ. Но детинкаяслы вӧлі веськодь, сійӧ нинӧм эз висьтав, век на варовитісны. Сэки каньыс гораа нявӧстіс. Детинка, буракӧ, гӧгӧрвоис «сигналсӧ», тэрыба кватитіс шатинсӧ да лэптіс неыджыд кельчи. Сэсся мездіс черисӧ вугырсьыс да шыбитіс каньыслы. Сійӧ мурзігтыр сёйис черисӧ да бара сувтіс аслас пост вылӧ — видзӧдны табъяс вылӧ.