ПЕТРӦВАНЛӦН СЛАВА
Гожӧмнас ӧшинь улын олісны ӧтлаын дзодзӧг семья да курӧгъяс. Кыкнан семьяыс быдтысисны, бать-мам бӧрсяыс котралісны виж ёкмыльяс. Дзодзӧг-батьыс вӧлі зэв гордӧй, тшап, синбӧжнас зывӧка видзӧдлывліс курӧгъяс вылӧ. Торйӧн нин сійӧ эз радейт Петук-Петрӧванӧс. Асывъяснас, кор аддзысясны ӧшинь улын, тшап дзодзӧг весиг эз здоровайтчыв Петрӧванкӧд. Петрӧван эз ӧбижайтчы сы вылӧ, век ноксьыліс аслас пӧдругаяс дорын. Петук кыдз Петук, нинӧмӧн эз торъяв сиктын мукӧд петукъясысь ни аслас туша-рожанас, ни сорсъяснас, ни шпораяснас, ни мича бӧжнас. Татшӧмыс быд сиктын тырыс. Аддзыліс кӧ кутшӧмкӧ тусь, эз жалитлы сетны сійӧс пӧдругаясыслы: «ко-ко-ко-ко!» — на, сёйӧй. Эз радейт косясьны сосед-петукъяскӧд. И, дерт нин, кор вӧлі колӧ, век ас кадӧ сьӧлӧмсяньыс чукӧстліс: «ку-ка-ре-ку!»
Гашкӧ, тадзи тӧдчытӧг да рама и оліс Петрӧван ассьыс нэмсӧ, но ӧтчыд лои ӧшинь улын ӧтитор, коді вайис Петрӧванлы ыджыд слава!..
Петрӧван аддзис канава дорысь нянь корка, кытыськӧ, буракӧ, Шарик вайӧма да абу сёйӧма. Коркаыс вӧлі чорыд нин, няйтӧсь, но, нинӧм: позьӧ кокавны... Ко-ко-ко-ко! — корис ас дорас курӧгъясӧс.
— Га-га-га! — Петрӧван кыліс дзодзӧг-батьлысь гӧлӧссӧ. Петрӧван лэптіс юрсӧ да видзӧдліс сылань.
— Га-га-га! — дзодзӧг видіс ассьыс пӧдругасӧ. — Кымынысь ме шулі, тэ эн матыстчы няйтӧсь курӧгъяс дорас... Найӧ сэтшӧм идӧртӧмӧсь, луксьӧны няйт пиын и куйӧд пиын... Срам! А тэ ещӧ сэні челядькӧд!
Петрӧван весиг эз видзӧдлы скӧр дзодзӧг-бать вылӧ, — тайӧ абу нин первойысь. Сійӧ кӧсйис нин бӧр заводитны кокавны нянь коркасӧ, но сэки друг лёкысь горӧдіс дзодзӧг-мамыс.
Петрӧван сувтіс кок чунь йылас, и пыр жӧ гӧгӧрвоис, мый лои. Енэжсянь из моз тювӧ-усьӧ на дінӧ курӧг-варыш. Ещӧ здук, и сійӧ кватитас дзодзӧгписӧ, коді вӧлі неуна бокынджык мукӧдъяссьыс. Петрӧван шлапнитіс бордъяснас, горӧдіс: «ку-ка-ре-ку» да уськӧдчис водзӧ.
Ӧні сӧмын сійӧ аддзис пеж рӧзбойниклысь пемыдвиж мышкусӧ. Петрӧван чеччыштіс да мый вынсьыс сатшкис гыжъяссӧ варышлы голяас. Сэсся бара шлапнитіс бордъяснас, чорыда-чорыда кокыштіс сылы юрас. Варыш лёздіс-уси.
«Неужели ме верми сійӧс? — думыштіс Петрӧван. — Неужели ме вии сійӧс? Дерт жӧ ме! Ме!»
— Ку-ка-ре-ку! — нимкодьысла горӧдіс Петрӧван.
Сійӧ лунсяньыс паськалі Петрӧванлӧн славаыс. Став курӧгыс ещӧ на пыдди пуктыны кутісны сійӧс. Славасӧ некыдз эз вермыны кусӧдны ни сосед-петукъясыс, ни мукӧд. Ӧні весиг тшап дзодзӧг-бать мӧд ногӧн кутіс видзӧдны сы вылӧ. Сійӧ ӧні аддзас Петрӧванӧс да улӧдз копыртчылас, пыдди пуктана шуас:
— Олан-вылан, Петрӧван!
