УТКА-МАМЛӦН ШОГ

Мизин дорын нюрас гожӧмбыд ноксисны мелиораторъяс, писькӧдісны канаваяс. Ыджыд тракторъяслӧн гораа мургӧмыс шызьӧдіс матігӧгӧрса вӧр-васӧ. Иван-сотчӧмын дзик вӧр дорас найӧ жӧ вӧлі кодйӧмаӧсь мыйлакӧ гӧп. Сійӧ абу паськыд, но вель джуджыд. Васяньыс гӧп дорышӧдзыс лоӧ метр кымын. Ӧтчыд вуграсянінысь локтігӧн, ми кежим Иван-сотчӧмас. «Чӧдлач пӧ вотыштам», — шуӧ Юля. Ми кежим сылань и буретш веськалім сійӧ гӧп дорас. Друг сэні кутіс герчкыны утка. Кор аддзис миянӧс, сійӧ пӧлынясигтыр да герчкигтыр кутіс мунны вӧрланьыс, думсьыс нуӧдӧ миянӧс бокӧджык. Ме пыр жӧ думышті: тані мыйкӧ неладнӧ... Гашкӧ, позйыс тані? Ме кытшовті матігӧгӧр, но некутшӧм поз ме эг аддзы. Друг Юля горӧдіс гӧп дорсяньыс:

— Волы, волы татчӧ! Гӧптас уткапиян пӧдӧмаӧсь...

Ме матыстчи сэтчӧ. Гӧптас збыльысь вӧлі вит кулӧм уткапи, чергысьӧмаӧсь вывлань кокӧн, бовъялӧны мыш выланыс. Ме пыр жӧ гӧгӧрвои; кор тракторъяс кутісны матыстчыны утка поз дорас, коньӧр утка-мамыс нуӧдіс ассьыс посни челядьсӧ ылӧджык, вӧрлань, и вот суис тані найӧс неминуча. Уткапиян усьӧмаӧсь гӧптас, а бӧрсӧ кайны абу вермӧмаӧсь, — ӧд найӧ эз на лэбавны. Дыр-ӧ сэні вӧліны? Код тӧдас!.. Буракӧ, тшыгйысла и кулӧмаӧсь... А коньӧр мамыс сэні оліс да герчкис-корис челядьсӧ петны гӧпсьыс.

Юлякӧд ми лэптім уткапиянсӧ да сэтчӧ жӧ и гӧп дорас гуалім. Гашкӧ, ӧні мамыс такалыштас да эновтас найӧс.