ВИЗЯОРДА

Ме босьті фотоаппарат да мӧдӧдчи ягӧ. Важӧн нин эз удайтчыв некутшӧм зверь-пӧткаӧс снимайтны. Тайӧ пӧрйӧ меным везитіс. Ме муна вӧрса векни ордымӧд да понӧль бокысь друг аддзи ичӧтик зверӧс. Тайӧ вӧлі визяорда. Сійӧ мыйкӧ ноксис понӧль дорас, буракӧ, сёян бӧрйис. Ичӧтик зверь казяліс менӧ да котӧртіс кыдз пу дорӧ. Сійӧ мунігмозыс чеччыштіс пу вылас, кӧсйис кайны выліас, но эз вермы, бӧр уси. Сэки сійӧ скӧрысь шутёвтіс-чирӧстіс да мӧдысь уськӧдчыліс кавшасьны пу вылас. Но и тайӧ пӧрйӧ сійӧ эз вермы кайны пу вылас.

Ме сулала и шензя: визяорда тӧлка да пельк зверь, мыйла сійӧ оз вермы кавшасьны пу йылас? Ме сулалі сысянь неылын да трачкӧді-снимайті сійӧс. Коймӧдысь босьтчылӧм бӧрын, визяорда сувтіс кык бӧръя кок вылас, а воддза лапаяснас кутіс кучкавны-барабанитны аслас кыз банбокъяс. Сэки восьса вомӧдыс кутісны гылавны муас кутшӧмкӧ пу кӧйдысъяс, косьмӧм ягӧдъяс. Кор рекмис вомкӧтшыс, визяорда звирк-чеччыштіс да здукӧн кайис кыдз пу йылӧдзыс. Сійӧ пуксис ув вылас, видзӧдіс ме вылӧ да скӧрысь шутёвтіс-чирӧстіс: «Шӧйтан пӧ кыті оз ков да кор оз ков!» Гашкӧ, сійӧ дасьтіс сёянсӧ пияныслы? Пу йывсьыс ме вӧчи бӧръя снимок да мӧдӧдчи водзӧ.