МЫЙЛА СКВОРЕЧНИКЫН НЕКОД ОЗ ОВ?

Ме вӧчи скворечник. Мича артмис. Тувъялі сійӧс потш йылӧ да сувтӧді амбар бокӧ. Воисны лунвылысь скворечьяс, но мыйлакӧ сэтчӧ эз овмӧдчыны. Недыр мысти овмӧдчисны сэтчӧ пышкай пара. Олісны гажаа, гораа сьылісны чирзісны. Гожӧмнас ачым аддзылі, кыдзи скворечник пытшкысь петісны пышкайпиян. Но кык во мысти менсьым скворечниктӧ эновтісны и пышкайяс. Ме шензя, мый лоис? Шуи видлыны скворечниксӧ, мыйла сійӧс эновтісны весиг пышкай гозъя.

Лэбачьяслысь керкасӧ ме косялі, и мый жӧ?! Сэні тырыс вӧлі кутшӧмсюрӧ клам, мыйысь найӧ вӧчӧны позсӧ. Сэні вӧлі и кос турун, вӧв гӧн, лэбач гӧн, быд пӧлӧс лестукторъяс, бумагаторъяс, весиг ӧти шайта бумага деньга. Пышкайяс кыскалӧмаӧсь сы мында сэтчӧ, мый асьныс абу кутӧмаӧсь тӧрны да лоӧма мунны сэтысь. Ме весалі керкасӧ да бӧр сувтӧді ас местаас. Коді ӧні сэтчӧ овмӧдчас?