ЭЗ КЫНМЫ!

Микол дядькӧд ми паныдасим Ыджыд ягын. Сійӧ лӧсышталіс пуясӧ кутшӧмкӧ пасъяс, а ме ветлӧдлі фотоаппаратӧн да мыйсюрӧ снимайталі. Лун шӧр бӧрын кымын ме мӧдӧдчи гортлань, а Микол дядь муніс водзӧ. Ме вуджи ыджыд туй, сэсся бӧр пыри вӧрас да пукси пашкыр пожӧм улӧ куритчыны. Вӧрын лӧнь, тӧв чир абу. Друг мыйкӧ кышакылыштіс и менам юр вылӧ шнёпкысис лым комӧк. Лымйыс пырис сьыліӧ, воротник сайӧ. Б-р-р-р... Кутшӧм кӧдзыд!.. Коді сэні вильшасьӧ. Час, видзӧдла... Чеччи да вешйи бокӧджык. Видзӧда пожӧмыс вылӧ, синъясӧн корся, коді вильшасьӧ. И друг кыла, быттьӧ кодкӧ гитаралысь вӧсни струнасӧ вӧрзьӧдіс: «Ти-и-и-нь!..» — Аддзи ӧд: пыста! Чеччалӧ увйысь увйӧ. Пожӧм кольяссӧ тракйӧ, кӧйдыссӧ корсьӧ.

Со коді вӧлӧм ме вылӧ лымсӧ койӧ!

— Но, другӧ, аттьӧ! Тӧвсӧ колльӧдін, эн кынмы? Но и бур, водзӧ ов да гажӧд йӧзсӧ.

Лэбач нинӧм эз вочавидз, ноксис ас местаас, корсис кынӧмпӧт, быттьӧкӧ ме эг вӧв сэні да видзӧд сы вылӧ.