КОДЛЫ КӦНІ БУРДЖЫК ОВНЫ...

Ывлаыс букыд. Шлапкӧ-усьӧ кос лым. Вӧрын лӧнь. Гыӧртӧм кыдз пу вылын пукалӧ Катша да китшкӧ-норасьӧ пӧрысь Ракалы:

— Кутшӧм нӧ тайӧ олӧм?! Сёйны ни юны пӧттӧдз он вермы. Кӧдзыд, частӧ тӧла овлӧ, он и шонавлы,век кынман... Чӧскыда узьны он вермы, весиг он вӧтасьлы... Ок, бӧб ме, бӧб! Мыйла ме мукӧд лэбачьяскӧд эг лэбзьы шоныдінас?..

Пӧрысь Рака чӧв оліс, терпитіс Катшалысь больгӧмсӧ, кор терпенньӧыс быри, ачыс шыасис:

— Код вылӧ нӧ норасян, кикимора? Тэнӧ тай лэбачьяс мудерӧн шуӧны, а тэ збыль вӧлӧмыд бӧб... Окота кӧ, мед колӧкӧ лэбин шоныд муас. Тэнӧ, буракӧ, некод эз кут... — шуаліс Рака да лэбис кытчӧкӧ аслас могӧн.

— Сійӧ и лёкыс, мый эг лэб. Сэні, шуӧны, ёна шоныд, сёяныд мыйта колӧ. Шуны кӧ, курорт...

— Эн сӧр, больгысь вом! Овны позьӧ быдлаын бура, пӧттӧдз сёйны, сӧмын эн дышӧдчы... А сёяныд и тані тырмӧ, слава богу! — коз пу вывсянь шыасис кодкӧ.

— Видзӧдтӧ, кодкӧ менӧ, Катшаӧс, велӧдӧ, кыдзи да кӧні овны... А тэ коді ачыд сэтшӧм сюсьыс?

— Ме? Да, тӧдан менӧ... Быд во ме тані тӧвъя, тундраысь курортавны татчӧ вола... Юалан, коді ме? Ме — Еджыд Сюзь... Менӧ тані став зверь-пӧткаыс тӧдӧны...

— А... Тэныд, гашкӧ, и лӧсьыд...

— Мыйла сӧмын меным? Тундраысь татчӧ локтісны унаӧн, кыдз тэ шуан, курортавны... Со аддзан, пукалӧны да сералӧны тэ вылын гӧрд морӧса Жоньяс, Байдӧг, Юрсикай, весиг ичӧтик Еджыдкай...

— Ме некыдз ог гӧгӧрво тіянӧс, — эз лэдзчысь Катша. — Мыйла сы ылнасяньыс локны татчӧ? Тіян, сэні тундраад, — лым, и тані — лым. Сэні — кӧдзыд, и тані — кӧдзыд!.. Тожӧ «курорт» аддзӧмыд!.. — зывӧка сӧдзӧдіс-шуис Катша.

— Дугды, Катша, эн янӧд асьтӧ! — ярскӧба шыасис Жонь. — Шуан ставыс ӧткодь? А вот и абу... Тані и лымйыс этшаджык, и кӧдзыдыс абу сэтшӧм чорыд... Весиг турӧбыс абу тундраын кодь... А сёяныд? Майбыр, тані уна. Меным, шуам, медся бурыс свет вылас ош льӧм...

— А пелысьсӧ вунӧдін? Ок, мыйта сійӧ! — содтіс Юрсикай.

— Да-да... Сідз, чойӧ, сідз!.. Ош льӧмыс да пелысьыс, другӧ, ёна чӧскыдджыкӧсь тэнад бананъяс дорысь...

— Вернӧ, — лым пиысь петіс да сёрниас тшӧтш пырис Еджыд Байдӧг. Тані уна кыдз пу, бадь пу... Налӧн гаръясыс чӧскыдсьыс чӧскыдӧсь... Вот ме пӧттӧдз кокала найӧс и лым пиӧ пыра. Сэні небыд, шоныд, абу тӧла... Мыйла абу курорт?

— Нинӧм шуны, тані позьӧ бура овны, — бара шыасис Еджыд Сюзь. Тундраад ӧд ставыс тыри лымйӧн, а тані эмӧсь и шыръяс, и кӧчьяс. Позьӧ, позьӧ тані овны... — кыв кӧрталіс Еджыд Сюзь.

Катша кывзіс-кывзіс да и шуӧ:

— Ме тадзи быдӧнлы норася, а, вӧлӧмкӧ, ачым курортын ола... Тешкодь!..

— Тэ, Катша, шоныд муяс йылысь эн шогсьы, эн жалит... Да и аслад слабиник бордъяснад эськӧ эн во шоныд муӧдзыс. Бурджык нин тані миянкӧд курортась.

Вӧрын бара лои лӧнь. Катша мыйкӧ дыра кежлӧ такалыштіс. Найӧ ставӧн разӧдчисны сёян корсьны...