СДАЧА

Петя тушанас кӧть и ичӧт, но ветліс нин первой классӧ, кужис нин артавны сёӧдз. Ӧтчыд батьыс, тракторист, гортас локтіс ӧбедайтны да тшӧктіс Петялы котӧртлыны лавкаӧ няньла. Петя зіля ветліс да вайис чӧлпан нянь. Ачыс рад, нюмъялӧ.

— Пап, а пап! Меным сдачасӧ унджык сетіс... Со видзӧдлы!..

Батьыс видзӧдліс. Вузасьысь сдачасӧ сетӧма збыль унджык, быдса кызь кӧпейка.

— Ӧні сійӧ менам, менам! — Петя гораа горзіс да чеччаліс кок пӧв йылас. — Муна да сы вылӧ ньӧба ирис... Да, папа?

— Колӧ кӧ ньӧб, — шуис батьыс. — Ирисыд, дерт, чӧскыд... Но ӧд ме вузасьысьсӧ тӧда. Сійӧ, Катя тьӧтка, сылӧн эм кык нывка... Ӧтиыс тэ кодь кымын жӧ... Сідзкӧ, Катя тьӧткаыс вештысяс миян няньысь аслас деньгаӧн, да нывкаясыслы оз ньӧб ирис.

Тадзи шуис Петялӧн батьыс, а ачыс муніс удж вылӧ. А Петя колис гортас, неуна ещӧ ворсісны каньпиыскӧд, сэсся дугдіс. Рытнас, кор батьыс локтіс удж вылысь, Петя дыр майшасис, мыйкӧ кӧсйис шуны батьыслы, сідзи и нинӧм эз шу. Водісны узьны, а оз узьсьы, век син водзас вӧлі кызь кӧпейкаа деньгаыс.

Аски асывнас сійӧ матыстчис батьыс дорӧ да негораа шуис:

— Вай ме ветла няньыдла. Сдачасӧ колӧ бӧр сетны...