УСТЯ

Гожӧмнас Юля пӧдругаясыскӧд кайліс ягӧ чӧдлач вотны и локтігас вайис нэриник пыстапи. Сійӧ вӧлі слаб, сувтса гӧна, — коньӧрӧй, буракӧ, усьӧма позсьыс да ёна нин тшыгъялӧма. Юля мыйлакӧ кутіс шуны сійӧс Устяӧн, гожӧмбыд дӧзьӧритіс, вердіс-юкталіс, и арнас ичӧтик Устяыд лоис пӧрнӧй мича пыстаӧн. Юрас — сьӧд шапка, а сьылісяньыс виж морӧсӧдзыс лэччӧ сьӧд визь — галстук. Веськыд кокас Юля гартіс пас пыдди гӧрд шӧвк сунис, — аддза кӧ пӧ кытыськӧ ывлаысь мед ме пыр жӧ тӧда Устяӧс. Йӧз дінӧ велаліс ӧдйӧ, ньӧти эз кут повны наысь. Горӧдас вӧлі Юля: «Устя! Устя!», — сійӧ лэбӧ сы дінӧ да пуксьӧ сылы пельпомас, юр вылас, либӧ нюжӧдӧм ки вылас. Восьса ӧшиньӧд сійӧ частӧ петавліс ывлаӧ, но недыр мысти бӧр воліс гортӧ. Аръявылыс сійӧ кутіс вошласьны пыр частӧджык, буракӧ, маті вӧрысь аддзис ассьыс рӧдвужсӧ. Сэсся ӧти лунӧ и дзикӧдз воши, эз лок гортӧ. Юля, дерт, шогсьӧ, муртса оз бӧрд. Но нинӧм он вӧч. Тадзи воши миян Устяным.

Арыс вӧлі кузь, мича, дыр эз лымъяв, да лымъялӧм бӧрас эз сразу кӧдздӧд. Кӧдзыдыс дзенӧбтіс коркӧ декабрь шӧрын кымын.

Асывнас ме чеччи водз. Комнатаӧс тӧлӧдыштӧм могысь ме восьті ӧшинь форточка да кухняӧ петі чай юны. Кӧдзыдысла талун посни классъясӧс оз велӧдны, и Юля вӧлі гортын. Пызан вылын дзужгис самӧвар, и ми пуксим сыкӧд чай юны. Пукалам, чӧсмасям оз вареньеа чайӧн, варовитам ӧттор-мӧдтор йылысь, и друг кыла: кӧнкӧ кодкӧ жбыркнитіс и занавессайса сёр вылын кыліс тӧдса: «Пинь! Пинь! Пинь! Пинь!» Ми кыкнанным чуймим, мый тайӧ? Ме чеччи да вешті занавессӧ, и Юля пыр жӧ горӧдіс: «Да тайӧ жӧ миян Устяным!» Да, збыль вӧлі Устя! Гашкӧ, сійӧ мый дыра нин виччысис?! Пурга вӧлі да форточкасӧ кык-куим лун нин эг восьтыв.

Вот тадзи бӧр воис Устя. Но сійӧ эз вӧв важ мозыс збой, поліс матыстчыны весиг Юля дорӧ. Важ местаас кухняӧ, ӧшиньдорса стенӧ, вӧчи ичӧтик джадж, Устялы сёянін. Юля пуктіс сэтчӧ кык блюд, — ӧтиас кисьтіс проса шыдӧс, мӧдас — йӧв. Ме петі аслам комнатаӧ да пукси уджавны. Юля ноксис мыйкӧ книгаяс видзан шкап дорын. Час мысти кымын петім видзӧдлыны, мый нин вӧчӧ миян гӧстяным. Шыдӧстӧ сійӧ абу и вӧрзьӧдлӧма, зато пызан вылысь сьӧд нянь шӧрӧм пӧшти ставнас кокалӧма, сӧмын коркаыс кольӧма. Ковмис меным ветлыны лавкаӧ да ньӧбны зӧр шыдӧс, — гожӧмнас сійӧс зэв бура сёйис. Сыысь кындзи, сійӧ ёна радейтліс семечки. Пуктан дозъяс, регыдӧн лукъяс, сӧмын кышыс лэбӧ ӧтарӧ-мӧдарӧ. Устя регыд мысти бӧр велалі ми дорӧ. Юля луннас школаын, а ме пукся пызан сайӧ уджавны, а Устя быттьӧ сэні и вӧлӧма. Пуксяс пызан вылӧ меным воча да дзоргӧ-видзӧдӧ ме вылӧ. Кор дӧзмас пукавнысӧ, лэбалыштас комнататі, да пуксьылас то менам юр вылӧ, то пельпом вылӧ да горӧдлас ассьыс: «Пинь! Пинь!» Ещӧ ӧтитор ме казялі сылысь: радейтіс вӧтлысьны тӧрӧканъяс бӧрся. Аддзас сійӧс кутшӧмкӧ пельӧсысь — лэбӧ нин сэтчӧ.

Вот тадзи и оліс тӧвбыд. Кор кӧдзыдыс личалыштіс, ме нарошнӧ восьтывлі форточка, но мунны сійӧ некытчӧ эз мун. Ӧшинь улын жбыръялыштас, гашкӧ, пӧдругаясыскӧд аддзӧдчылас, сэсся пуксяс форточка дорышӧ да сьылӧ ассьыс песнясӧ, а гашкӧ, пӧдругаяссӧ корӧ пырны керкаӧ. Пукалыштас сэні, и бӧр лэбас аслас местаӧ. Комнатаас кык ӧшинь костын менам вӧлі книжнӧй шкап, а весьтас стенас тувъялі шыльыд бедь, — сэні сійӧ и узьліс. Керкаын шоныд, кынӧмыс пӧт, — мый не овны сылы?!

Локтіс тулыс. Ывлаыс шондӧдіс, кутіс нин тёпӧдны войтва. Ывлаын гораммис гӧлӧсыс пышкайяслӧн. И Устя вежсис, кутіс нервничайтны, чирзыны не аслас гӧлӧсӧн, скӧравны, частӧ матыстчывны форточка дорӧ. Ме, дерт, пыр жӧ гӧгӧрвои лэбачлысь тӧждлунсӧ. Ме восьті форточка, сійӧ пуксис дорышас да горӧдіс: «Пинь! Пинь!» Буракӧ, прӧщайтчис мекӧд... и лэбис. Колис мыйкӧ дыра кад, но сійӧ эз вунӧд «тӧвся квартирасӧ», корсюрӧ волывліс. Пуксяс вӧлі форточка дорышӧ, либӧ ӧшинь курич вылӧ да сьылӧ: не то пӧвсӧ корӧ, не то мыйкӧ ещӧ. А керкаӧ сэсся эз нин пырав.

А, гашкӧ, тӧвнас бара локтас? Код тӧдас!