НЕМКО
Челядь кытыськӧ вайисны грездӧ понпи. Сійӧ вӧлі мисьтӧминик: ыджыд юра, дженьыдик вӧсни кокъяса. Сувтса гӧныс не то рыжӧй, не то руд. Гырдмӧм синъясыс вералісны виж рӧмӧн. Но челядь ворсісны сыкӧд, котрӧдлісны мудзтӧдзыс, а вой кежлас йӧртлісны Борялы кильчӧ пос улас. Кор челядь разӧдчисны, Боря пыраліс гортас да петкӧдіс понпилы важ тасьтіӧн нянь крӧшкиа йӧв. Понпи, виньдалігтыр, азыма сёйис да нюжӧдчис бок вылас. Понпи эз на сетлы гӧлӧссӧ, эз увтчы, ни эз никсы. Буракӧ, ёна мудзӧма. Аскинас бара жӧ сійӧ — челядь котралісны, ворсісны сыкӧд.
Колӧ шуны, челядь оз жалитны понлы сёянсӧ. Вердісны век пӧттӧдзыс, бура. Вайлісны юква и яя шыд, рок, жаритӧм картупель, нянь, весиг уль яй кусӧкъяс. И вежон кык мысти тӧдчис нин, мый сійӧ быдмыштіс, гӧныс шыляліс, весиг лӧставны кутіс. Лоис гажаджык, и заводитіс весиг ачыс вильшасьны.
Мый ӧд сылы, понпиыдлы? Асывнас челядь вердасны, и сійӧ лун-лун бергалӧ на дорын, котралӧ накӧд, быттьӧкӧ тшӧтш ворсӧ футболӧн, весиг купайтчӧ накӧд. Кодкӧ кӧ ӧбӧдитліс сійӧс, понпи вешйыліс бокӧ да жугыля видзӧдліс челядь вылӧ. Но регыд мысти сылӧн вунліс ӧбидаыс да бӧр матыстчывліс челядь дорӧ да ышмывліс важсясьыс ёнджыка, кӧть шы некор эз сетлы.
Понпи мыйлакӧ оз увтчыв, ни оз эргыв. Тыдалӧ, яндысис мукӧд понъясысь аслас мисьтӧмлун вӧсна, оліс дзик немӧй моз. Та вӧсна челядь кутісны шуны сійӧс Немкоӧн. Немко вӧлі рам. Радейтісны сійӧс не сӧмын челядь, но и кодсюрӧ гырысьяс пиысь. Найӧ век аддзылісны сылы мелі кыв, а корсюрӧ сетлісны сылы кампет, сакар тор, булка тор либӧ кӧлач.
Арнас челядь мунісны школаӧ. Немколы ӧтнаслы лоис гажтӧм. Гоз-мӧдысь вӧтчыліс челядь бӧрся, но мукӧд грездса понъяс вӧтлывлісны бӧр. Та вӧсна челядь бӧрся мунны эз лысьт, а ветлӧдліс аслас грездӧд, кӧні мукӧд понъяс эз вӧвны. Частӧ волывліс чой горулӧ да видзӧдіс выліас, кытысянь мыччысьлӧны челядь. Кор вӧлі аддзас найӧс, сійӧ уськӧдчыліс налы воча.
Сійӧ арнас Боря мам ордӧ ылі войвыв карысь воис гӧститны мамыслӧн ичӧтджык вокыс гӧтырыскӧд да нёль арӧса нывкакӧд. Мамыслӧн вокыс, Петя дядь, гортас прамӧя оз и волы, лун и вой колляліс вӧрын да берег дорын. Ангелина, гӧтырыс, пӧшти эз петавлы керкасьыс, век нуӧдіс верӧссӧ ӧдйӧджык бӧр мунны гортас. Кор Боря вӧлі школаын, нывка ӧтнасӧн гуляйтіс ӧшинь улын, ворсіс Немкокӧд. Мамыс сӧмын корсюрӧ петавліс видзӧдлыны сійӧс. Кыдзкӧ ӧтчыд Ангелина петіс кильчӧ бокӧ да жаляддза кӧсйис малыштны Немкоӧс. Нюжӧдіс кисӧ, кытысь паркйис чорыд духи дук. Немко кыліс дуксӧ, бергӧдчис мӧдарӧ да гораа несйис. Лэччис пос вылысь, лэптіс бӧръя шуйга коксӧ да кӧсйис... кӧтӧдыштны мусӧ. Ангелина, дерт, терпитны тайӧс эз вермы, пузис да скӧрысь чужйис Немколы. Немко чилӧстіс (вӧлисти гӧлӧсыс петіс) да котӧртіс керка пельӧсӧ да сэтысянь бугжыля видзӧдліс тешкодь нывбаба вылӧ. Нывка кутіс бӧр чуксавны сійӧс: «Немко, Немко! Лок ме дінӧ!» Но Немко матыстчыны нывбаба дырйи сы дінӧ эз лысьт. Нывка бӧрддзис да пырис керкаас.
Кор челядь гортынӧсь, гажтӧмыд оз босьт. Век нин кодкӧ да Немко дінын. А кор школаынӧсь? Сылы гажтӧм, ворсны некодкӧд.
...Асывсяньыс буситіс посни зэр. Зэригад ывлаті он котрав. Нывка петіс да пуксис кильчӧ пос вылӧ. Чукӧстіс ас дорас Немкоӧс. Понпи эз ыждав, локтіс нывка дорӧ. Легнитіс бӧжнас да пельяссӧ топӧдӧмӧн меліа видзӧдліс нывка вылӧ. Нывка кутіс малавны сійӧс. И Немко пуктіс нывлы пидзӧс вылӧ юрсӧ. Тадзи найӧс и суис Ангелина, нывкалӧн мамыс. Сійӧ вӧлі югыдлӧз плаща. Киас кутіс японскӧй зонтик. Буракӧ, мӧдӧдчӧма лавкаӧ.
— Мам, а мам, видзӧд... — кӧсйис мыйкӧ шуны нывка, но эз удит. Мамыс лёкысь горӧдіс. Немко повзис да сувтіс кок йылас, но эз пышйы. Сійӧ мыжапырысь, но эскана видзӧдліс нывбаба вылӧ, коді вӧлі зонтика кисӧ лэптӧма вылӧ, медым кучкыны Немколы. Немко асьсӧ эз лыддьы мыжаӧн. Эз виччысь, мый сылы кучкасны. И сэки нывбаба мый вынсьыс зонтикнас швачкӧбтіс понйыслы ӧтчыд, мӧдысь... Лэптіс нин кисӧ коймӧдысь, но кучкыны эз нин удит. Немко чеччыштіс да пышйис керка пельӧс сайӧ, а нывка гораа бӧрддзис.
Немко муніс. Сылы паныдасис Боря, коді вӧлі локтӧ школаысь. Боря гораа чуксаліс, но Немко муртса сувтыштліс, здук кежлӧ юрсӧ бергӧдліс Борялань да видзӧдліс сы вылӧ. Но матыстчыны эз матыстчы. Буракӧ, ёна ӧбӧдитчис. Бӧръя веськыд кок вылас чотігтыр, сійӧ котӧртіс водзӧ... Кытчӧ? Код тӧдас?
Сійӧс сэсся некор нин эз аддзывны грездысь. Сӧмын челядь дыр на казьтылісны сійӧс.
