ВУГРАСЬНЫ МУНІГӦН...
Федя вуграсьны векджык лэччывлӧ Мизин дорӧ веськыда пода туйӧд. Талун мыйлакӧ мӧдӧдчис мӧдлаті. Муніс грезд помӧдзыс, а сэні туйыс кежӧ шуйгавылӧ, мунӧ муяс пӧлӧн да петкӧдӧ паськыд луд вылӧ. Сэтысянь юыс зэв нин матын. Тайӧ туйӧдыс Федя эз радейт ветлыны. Эз радейт сы вӧсна, мый сикт помас оліс Витя Кутькин, кальӧг вома детинка. Сылӧн вӧлі ас кодьыс жӧ кальӧг пон. Сійӧ кӧть эз вӧв бульдог, либӧ овчарка, а прӧстӧ ичӧтик дворняжка, Витя кутіс сійӧс чеп йылын. Кор Федя мунӧ на дорті, понмыс век матыстчӧ потшӧс дорас, лапасӧ лэптӧ шӧр потш вылас да лёкысь заводитӧ эргыны-увтчыны. Сэки сэтчӧ матыстчӧ сылӧн кӧзяиныс да горӧдӧ:
— Эй, рыбак, розя бак! Талун тэ со мый ыдждаӧс кыян! — сійӧ кабыртӧ веськыд кулаксӧ да водз да шӧр чунь костӧдыс петкӧдлӧ певсӧ — фигу, ачыс гораа сералӧ...
Федя оз кывзы сылысь больгӧмсӧ, тэрыба восьлалӧ, весиг оз видзӧдлы Витя вылӧ. Сылы некор, тэрмасьӧ. А кор Федя кутас бӧр локны гортас, Витя тӧдӧмысь, кыдзи и век, бара юалас:
— Эй, Федя-редя, Мизинас чериыс коли на?
Тадзи сійӧ век юасьӧ, кор Федялы нинӧм оз шед. А кытысь сійӧ тӧдӧ, мый чериыс оз шед? А черитӧгыс Федя волывлӧ частӧ. Сідзи нин артмӧ: талун шедас, а аски оз...
Но талун луныс вӧлі мича. Абу тӧла. Чериыс, колӧ чайтны, кутас сёйны. Федя прӧйдитіс Кутькинъяс дорті. Кузь вугыр шатьсӧ вештіс мӧд пельпом вылас да кежис шуйгавылӧ. Кузь му бокын водзын мургис трактор. Федя локтіс туй вожӧдзыс, коді нуис ю дорӧ, но сэтчӧ эз кеж, а мӧдӧдчис трактор дорӧ. Сылы колӧ вӧлі ӧктыны нидзувъяс. А ӧктыліс сійӧ выльӧн лэптӧм бӧрӧздасьыс.
Федя чеччаліс лэптӧм му пластъяс вывті, веськӧдчис тракторлань. Трактористнас вӧлі Петя дядьыс, мамыслӧн ичӧтджык вокыс. Дядьыс оліс накӧд орччӧн.
Важиник трактор, сьӧкыда ружтігтыр, ньӧжйӧник кыссис му мӧдар помлань. Тракторлӧн шыыс частӧ оръясьліс, то гораа мурӧстліс, то заводитіс «несъявны», то дзикӧдз ланьтліс, сэсся бара мурӧстліс да кыссьыліс водзӧ. Гӧрӧм му вылас чеччалісны сьӧд ракаяс: корсисны нидзувъяс. Федя му комӧкъясӧн кутіс лыйлыны найӧс, вӧтлыны му вывсьыс.
Трактор локтіс Федя дорӧдз да сувтіс. Петя дядьыс петіс кабинасьыс.
— Мыйкӧ менам старик талун дурны кутіс, — Федялы норасис тракторист. — Свечаясыс, буракӧ, тшыксьӧмаӧсь...
Сійӧ лэптіс моторыслысь капотсӧ: сэтысянь ӧвтыштіс жарӧн.
— А талун колӧ вӧлі помавны тайӧ мусӧ... — водзӧ сёрнитіс тракторист.
Дядьыс перйис свечаяссӧ, чышкаліс кос рузумӧн, видзӧдліс найӧс, сэсся шуис:
— Э-э-э! Лёк делӧыс вӧлӧма!..
Ӧти свеча вӧлі потӧма, а запаснӧйыс эськӧ эм, но ключьясыс абуӧсь. Тӧрыт гортас мотоцикл разявліс, ключьяссӧ босьтліс тракторыслысь, и вунӧма гортас.
Федя жалитыштіс Петя дядьсӧ, гыжйыштіс балябӧжсӧ. Сійӧ бура гӧгӧрвоис, дядьыслӧн делӧясыс лёкӧсь, но отсавны сійӧ нинӧмӧн эз вермы. Тракторсьыс сійӧ нинӧм оз гӧгӧрво, школаын эз на велӧдны. А вуграсьӧм кузя кӧ? Сійӧ, дерт, отсаліс эськӧ пыр жӧ. Шуам, кутшӧм черилы мый самавны?.. Ёкыш радейтӧ кузь нидзув, а сынпиян радейтӧны пучӧй. Федя тӧдӧ весиг, Мизинын кӧні кутшӧм чери сёйӧ.
— Но, племяш, мый кутам вӧчны? — Юаліс Петя дядь.
— Ме ог тӧд, — ышловзис Федя. — Школаын ми тракторсӧ эг на велӧдӧй...
Петя дядь видлаліс мукӧд свечаяссӧ, сэсся бергӧдчис Федялань да шуис сылы:
— Со мый, Федя-редя... Вугыр шатинтӧ татчӧ коль, а ачыд котӧртлы миянӧ гортӧ...
— Мыйла?
— Менам сарайын, верстак вылын эм пу ящик... А сэні бокас эм кык ключ. Видзӧд: со кутшӧмӧсь... Ӧтиыслӧн бокас гижӧма № 14, а мӧдыслӧн — № 17. Отсав меным, другӧ... Котӧртлы да вай найӧс. Вуграсьны тэ аски верман, а гӧрны колӧ меным талун...
Петя дядь кутіс чышкавны дзонь свечаяссӧ, а Федя пӧрччис сумкасӧ, пуктіс сійӧс гусеница вылас, а ачыс уськӧдчис грездӧ.
...Свеча. Ичӧтик и эм, а мыйта выныс... Петя дядь чышкаліс тшӧтш выльяссӧ, сэсся бӧр пукталіс местаясас, йитіс магнето проводъяссӧ, сэсся заводнӧй ручкасӧ бергӧдыштіс гоз-мӧдысь. Трактор «несйис» некымынысь, гораа сярӧбтіс, сэсся ӧтмоза заводитіс мургыны.
— Окота кӧ лои, пуксьы кабинаӧ, — Федяӧс корис дядьыс.
Сійӧс кыкысь корны эз ковмы. Пуксис. Мӧдӧдчисны. Вӧчисны ӧти кытш, мӧдӧс...
— Рулитнысӧ сьӧкыд? — юаліс Федя.
— Окота? — гӧгӧрвоис Петя дядьыс.
— Дерт жӧ окота! — вочавидзис Федя.
— Вот мунам помӧдзыс и сета тэныд бергӧдчыны...
Со и муыслӧн пом. Петя дядь кыскыштіс провод, кодӧс нюжӧдӧма плугвывса автоматӧдз. Плуг зэлӧдчис, кыпӧдіс муысь югъялысь амысьяссӧ. Трактор быттьӧ лэчкысь мыні, — тэрыба тювӧдіс эжа вывті.
— Вот тайӧ рычагсӧ кыскыштан, — кежас веськыдвылӧ, а тайӧс — шуйгавылӧ, — Федяӧс велӧдіс дядьыс. — Пуксьы ме местаӧ...
Федя сатшкысис рычагъясӧ, а ачыс видзӧдӧ водзӧ.
— Бергӧд нин! — горзӧ дядьыс. — Бергӧд шуйгавылӧ!..
Федя кыскыштіс асланьыс рычагсӧ. Трактор быттьӧ джӧмдыштліс да бергӧдчис гусеница вылас.
— Эн чорыда, тэрмасьтӧг! — горӧдіс дядьыс. — А ӧні шуйганас!..
Федя кыскыштіс шуйга рычагсӧ, трактор бергӧдчис шуйгавылас. Петя дядь ачыс кутчысис рычагъясас.
— Татчӧ уна вын оз ков! Висьтав рычагнас кытчӧ мунны, сэтчӧ и мунас.
Му помас Петя дядьыс шуис Федялы:
— Мун сэсся вугрась, черитӧ кый...
— А сетан ещӧ бергӧдчыны?
— Кӧсъян кӧ сета...
...Федя талун сідзи и эз кӧтӧдлы вугырсӧ, но гортас муніс шуда, нюмъялігтыр.
Кор локтіс Витя Кутькин керка дорӧдз, кыліс, кыдзи чепнас зильӧдчигтыр, понмыс локтіс потшӧс дорӧдз да заводитіс эргыны. Сэтчӧ жӧ локтіс и кӧзяиныс, Витя.
— Эй, рыбак — потӧм бак! Мизинас чериыс коли на? А-а-а... Тэ, буракӧ, нырнад му гӧрӧмыд?
Федя, дерт, гӧгӧрвоис, мый нырыс сылӧн сьӧд, Петя дядьыслӧн моз жӧ, но эз дорйысь, а ньӧжйӧник шуис:
— Гӧри, но эг нырӧн, а плугйӧн...
— Плугйӧн! Ха-ха-ха! Нырнад, а не плугйӧн. — Витя гораа сераліс, а понмыс гораа увтчис.
Федя тшапа муніс на дорті, весиг эз видзӧдлы на вылӧ... Сійӧ вӧлі шуда...
