КОДІ БАКВАЛЫС?
Катя баб дорӧ Сыктывкарысь воис сылӧн Денис внукыс. Ми, челядь чукӧр, регыд тӧдмасим сыкӧд, и кутім ӧтлаын ворсны, лэччывны Мизин дорӧ купайтчыны.
Меным сійӧ эз кажитчы, век мыйӧнкӧ ошйысьӧ, быттьӧкӧ медся уна тӧдӧ. Шуны кӧ, став баквалъяс пиысь медся баквал. А ошйысьліс быдторйӧн, — мый сійӧ карын медся джуджыд керкаас олӧ, мый карын уна автомашина, мый сылӧн батьыс частӧ командировкаӧ ветлӧ Москваӧ, мый сылӧн эм уна рӧма телевизор, и телефон, и ичӧтик болонка пон, и кань да сідз водзӧ.
Ме терпитны ог вермы баквалъястӧ, кодъяс дугдывтӧг ошйысьӧны. Ӧтчыд ми челядькӧд сёрнитчим и шуим сійӧс «велӧдыштны», янӧдны... Шуим вӧчны сідзи: ме пана Денискӧд сёрни. Сійӧ, кыдзи и век, заводитас мыйӧнкӧ баквалитны, ошйысьны. Сэки ме лэпта веськыд киӧс, и менам знак серти челядь кутасны кинас клопайтны да горзыны «баквал — ыкша, баквал — ыкша!»
— А сійӧ кӧ талун оз кут ошйысьны? Кутам жӧ горзыны? — юаліс Васька-рыжик. Тадзи сійӧс гӧрд юрси вӧснаыс шуисны.
— Кутас, — шуи ме. — Баквалъяс век ыкшасьӧны, лун и вой.
— Денис, лок пет мачасьны, — горӧдіс Васька-рыжик.
Денис пыр жӧ петіс да шуис:
— Лыддя вӧлі зэв интереснӧй книга. Шусьӧ «Робинзон Крузо». Ой, сэтшӧм интереснӧй!
Ми челядькӧд пуксялім ӧшинь ув потшӧс вылӧ. Сійӧ миян дорын сулалӧ...
— Ёна тай! Интереснӧй книгаыд уна... Ме вот лыддя «Фантомас», а тэ сійӧс синнад эн аддзыв.
Денис нинӧм эз шу, чӧв оліс.
— Ошйысян, мый олан Сыктывкарын, — водзӧ нуӧді ме. — Сыктывкарыд абу ылын... А вот менам вокӧй олӧ Мурманскын... Сідз ӧд, ребята? Да ещӧ ветлӧдлӧ океанскӧй пароход вылын, и ме чӧв ола. А Мурманскыд дас пӧв ылынджык Сыктывкарсяньыд...
Денис, тыдалӧ, эз виччысь татшӧм сёрнисӧ да неуна шӧйӧвошикодь. А ме водзӧ куті атакуйтны сійӧс: — Батьыд, шуан, Москваӧ ветлывлӧ, — нери ме сійӧс. — А менам дед война дырйи Берлинӧдз волӧма. Тӧдан, кымын орден да медаль сылӧн? А тэнад батьыдлӧн абу пӧди? Вернӧ, ребята? — бара шыаси челядь дорӧ.
Челядь довкйӧдлӧны юрнас: вернӧ пӧ! А ме водзӧ:
— Аддзӧмыд тай пон, кутшӧмкӧ «болванка!» А вот миян спаниель вӧлі, вӧлі уткатӧ кутас да гортӧ вайӧ. А тэ шуан.
Челядь кывзӧны, нюмъялӧны, но нинӧм оз шуны.
— Сэтшӧм понйыс оз овлы, мед уткаяс куталіс, — эз эскы Денис.
— А вот и овлӧ, — шыасис тшӧтш Гена. — Педӧр дядьлӧн Тайгаыс весиг тар вайліс...
— Ог тӧд, — бара на эз эскы Денис.
— Он тӧд... Ме аслам синъясӧн аддзылі да, — эз лэдзчысь Гена.
— Ладнӧ, поннад и ставнас. А вот тэ шуан, тіян пӧ кань эм? А кутшӧм?
— Кузь гӧна, сибирскӧй рӧд...
— Э-э... — горӧді ме, — «сибирскӧй»... А миян вӧлі сиамскӧй. Вернӧ, Лиза? Дзик тигр кодь!
— Оз вермы лоны тигр кодь каньыс?! — вочавидзис Денис.
— Да, да... Вот и овлӧ... Налӧн бокыс визьӧсь, збыль дзик тигр кодь. Сӧмын ичӧт, — отсаліс меным Лиза. Челядь серӧктісны. Ме гӧгӧрвои, мый челядь ме дор сулалӧны, ме ещӧ на ышмышті. Шуи Денислы:
— А телевизорыд ӧні быдӧнлӧн эм. Босьтӧ не сӧмын Сыктывкар, но и Москва... Сідзкӧ, телевизорнад эн ошйысь!.. А менам эм компас... А чужан лун кежлӧ бать ньӧбас мопед...
— Збыль? — горӧдіс Васька-рыжик. — А мем сетлан катайтчыны?
— А мем, мем? — кутісны горзыны челядь.
— Мыйла буретш тіянлы? — скӧрмис Васька-рыжик. — Менам сійӧ друг, и насянь медматын ола...
— Ладнӧ, энӧ шумитӧй, ставныдлы сетла... — ӧлӧді челядьӧс да видзӧдлі на вылӧ. Найӧ нюмъялӧны. Сійӧ сетіс меным выль вын да бара куті «атакуйтны» Денисӧс.
— Шуан, телефон эм? Мед эм кӧ. Бур. Миян Иван дядьлӧн эм жӧ... Но мый сыысь? Бать кӧ тшӧктас, миянӧ аски жӧ пыртасны...
Денис мыйкӧ кӧсйис шуны, но ме вомалі, эг лэдз:
— И ещӧ... Ме тэысь быдса арӧсӧн ыджыд... и век лоа ыджыдджык... Ме ставсӧ тэысь водзджык кута вӧчны... Лыддьысьны и гижны. Быдма да лоа министрӧн...
Сэсся челядьлы ме петкӧдлі знак, лэпті веськыд киӧс. Найӧ кутісны клопайтны да горзыны:
— Ыкша — баквал! Баквал — ыкша!
Ме сэки видзӧдлі на вылӧ да чуйми. Найӧ видзӧдлісны эз Денис вылӧ, а ме вылӧ.
Ме чуйми... Мый нӧ, баквалыс ме али мый?
