ПАПУЛЯ, МАМУЛЯ, МАКС ДА БАБУЛЯ

— Эй, Максим! Макси-и-им! Калябеч, кылан он? Со пемыд нин! Пыр нин гортӧ! — ӧшинь форточкаӧд горзіс Максимлӧн бабыс. Но Максимлы пырны гортас абу окота: челядь чужъялӧны футбол, а кыдзи нӧ сытӧг, медбур ворсысьтӧгыс?

Сӧмын кор нин нинӧм эз кут тыдавны ывла вылын, йирк-грым воссис керка ӧдзӧс да гортас тӧв ныр моз лэбис-пырис Максим, квайтӧд классын велӧдчысь детинка. Пальтоыс кизявтӧм. Веськыд киас кутӧ портфель, мӧдас — кӧвйӧдыс футбол мач. Мачсӧ лэдзис жырйӧ да гӧгыльтӧдіс пельӧсӧ.

— О, господи-енмӧй! Видзӧдлы ас вылад!.. Няйт гуранӧ водлін али мый? — бокъясас кияснас швачӧдігтыр шензис-дивитіс внуксӧ бабыс. — А пальтоыс? А кӧмыс?

— Ньӧти абу няйт! — чушкис нырнас Максим. — Тэ ачыд няйт!

— Час, батьыд локтас да ме сорита, кыдзи тэ мекӧд сёрнитан...

— Сорит, колӧкӧ... Да эн дзоргы ме вылӧ сідз!.. Эн аддзыв?

— Ок и быдтас!.. Код рӧдӧ мунӧма? Батьыд тай эз вӧв татшӧм-а.

— Да, ланьт нин, мися... Тупкы пиньтӧм вомтӧ, пӧрысь выжыв.

Бабыс, буракӧ, ещӧ на мыйкӧ кӧсйис шуны, но забеднӧысла гӧрддзасис горшыс да кинас синъяссӧ чышкалігтыр пырис аслас ичӧтик жырйӧ.

Воссис мӧд ӧдзӧс и узьлан комнатаысь петіс Максимлӧн мамыс, Анжелика Вениаминовна. Мича шӧвк халатсӧ кизялігмоз, чӧскыда очсалігтыр, локтіс пиыс дінӧ:

— Макс, тэ гортын нин? Менам бура и унмовсьлысьӧма, — синъяссӧ тілис Анжелика Вениаминовна.

— Ог ӧд ывлаас узь... — букыштчыліс Максим.

— О-о! Ме видзӧда да тэ бара талун футбол чужъялӧмыд? Кымынысь ме тэд шулі...

— Кымынысь, кымынысь... Тэ дорын али мый век меным пукавны! — детинка шыбитіс диван вылас портфельсӧ, сэсся нетшыштіс вывсьыс пальтосӧ да тшӧтш шыбитіс диван вылас. Синъясыс Максимлӧн югъялісны, бан бокъясыс гӧрдӧдӧмаӧсь. Герой-футболист и эм!

— Макс, ме тэнсьыд ещӧ ӧтчыд юала, кор дугдан чужъявны футболсӧ? — терпениесьыс кутіс петны Анжелика Вениаминовна. — О, господи, ставыс няйт! А киясыс? А чужӧмыс?

— «О, господи, господи!» — шушкыль кывйӧн Максим нерыштіс мамсӧ. — Шуӧны тэныд, ме эг ворс!

— Кыдзи нӧ тэ эн ворс, ставыс кӧ няйт!

— Да тэнад синмыд аслад няйт узьӧмыдла... Мун первой мыссьы! Мед оз кут веравны!..

— Да тайӧ нӧ мый ещӧ?! Мый тэ горзан ме вылӧ? Ме тэныд мам али абу? Ой, эн дзикӧдз скӧрмӧд менӧ, Макс! — дирижёр моз кинас ӧвтчис Анжелика Вениаминовна. — Бара ворота пыдди портфельыд вӧлі? Ой-ой-ой! Бать-мамыс сылы кӧмкот-паськӧм ньӧбалӧны, портфель быд во выльӧс ньӧбӧны, а сійӧ...

— Ӧти-кӧ, ми портфеляс эгӧ чужъялӧй... Мӧд-кӧ, портфельсӧ ньӧбис бать, а эн тэ! Коймӧд-кӧ, тэ ме моз жӧ бать сьылі вылын пукалан — сійӧ тэнӧ вердӧ-юкталӧ, кӧмӧдӧ-пасьтӧдӧ...

— Ланьт, яндысьтӧм син!

— Кык син костад уна-ӧ яндзим тӧрӧ...

— Мый, мый шуин, сӧтана рӧд?! Кытысь татшӧм кывъяссӧ кывлін? — тіралана гӧлӧсӧн горзіс Анжелика Вениаминовна.

— Кытысь? Тэнсьыд. Ачыд жӧ батьлы век тадзи горзан, кор сійӧ тэнӧ янӧдӧ...

— Ланьт нин! — друг раммыштіс Анжелика Вениаминовна. — Ме эськӧ, колӧкӧ, важӧн нин муні уджавны, да вот тэнӧ колӧ быдтыны-воспитайтны... Тэ вӧсна омӧля сёя, омӧля узя...

Аслас ичӧтик жырйысь бӧр петіс бабыс, меліа шуис:

— Максим, бур пи, мыйла нӧ быдӧнкӧд тшетшкӧдчан? Ӧні жӧ кор мамыдлысь прӧща...

— А мый, верма, — веськодя вочавидзис Максим.

— А то чужан лун кежлад МАГ-тӧ ог ньӧб, — вашмуніс Анжелика Вениаминовна.

Максим дышпырысь чеччис диван вылысь да катласигтыр, локтіс мамыс дорӧ.

— Прӧстит, — нурбыльтіс вомгорулас.

— Важӧн эськӧ мед тадзи, — пиыслысь юрсӧ малалігтыр, шуӧ Анжелика Вениаминовна. — Мун мыссьы да сёй... Сэсся пуксьы да урокъястӧ вӧч... Ставсӧ кӧ вӧчан бура, кино вылӧ деньга сета.

— Ладнӧ, мамуля! Ставсӧ вӧча бура...

Бабыс вердіс-юкталіс внуксӧ, сэсся пуксис диван вылӧ видзӧдны телевизор. Максим локтіс бабыс дорӧ. Меліа ниртыштчигмоз шуис:

— Бабуля, ме неуна тшӧтш видзӧдышта тэкӧд...

— А урокыд?..

— Удита, талун эз уна сетны. Мультиксӧ меным быть колӧ видзӧдны.

Анжелика Вениаминовна дорӧ локтіс суседка-пӧдругаыс да мый йылысь кӧ вель дыр вашкӧдчисны. Пӧдругаыс муніс час мысти кымын. Анжелика Вениаминовна сӧмын сэки казяліс, мый Макс абу на пуксьылӧма вӧчны урокъяссӧ.

— Макс, пиук, вӧчышт нин урокъястӧ, — пиыслы меліа шуӧ мамыс.

Максим дышпырысь чеччис да довгис аслас жырйӧ.

— Бабуля! А бабуля! Кӧні менам «Физика» учебникыс? — пызан сайсянь горзӧ Максим. — Войдӧрлун ме сійӧс диван вылӧ кольлі. Бара кытчӧкӧ дзебин?

— А тэ эн шыблав, кытчӧ оз ков... Сы вылӧ тэныд ньӧбӧма этажерка... Мӧдысь кежлӧ сэтчӧ и тэчав! Гӧгӧрвоин?

— Гӧгӧрвои... Но ӧні сёрниыс оз мун этажерка йылысь... Менам «Физика» абу! Кӧні сійӧ?

Бабыс ӧчкисӧ вештӧ ныр вылысь да мунӧ этажерка дорӧ корсьны «Физика».

— Со тэнад «Физикаыд»... На, велӧд!

— А «Математика» кӧні? — бара горӧдіс Максим.

Керкаын лоис чӧв-лӧнь. Бабыс нёровтчис диван вылӧ шойччыштны. Коли минут вит-квайт. Максим клоп пӧдлаліс «Физикасӧ», вештіс бокӧ да горӧдіс:

— Мамуля, мамуля, ме петала пальӧдчыштны?

— Сэк кості вӧчин нин али мый став уроктӧ?

— Вӧчи, дерт.

— Сідзкӧ, вайлы дневниктӧ, — корис Анжелика Вениаминовна.

— Абу... Менам сійӧ вошӧма либӧ школаӧ кольӧма.

— Ме жӧ сёысь нин шулі, мый учительясыд ньӧти оз тӧждысьны ті вӧсна... Вот ме норася директорыдлы...

— Збыль... Оз ӧд и тӧждысьны... Дневникыс ӧд уналӧн абу... Норасьны и колӧ, мед директор петкӧдлас налы пуж.

— Дерт жӧ петкӧдлас, — эскӧдӧ писӧ Анжелика Вениаминовна. — Вот лоас бать-мамлӧн собрание, ставсӧ висьтала...

Максим чӧв олӧ. Сійӧ дӧвӧлен аснас. Ставыс лои бур, — думайтӧ сійӧ.

Сэки коридорын кыліс звӧнок шы. Пырис Максимлӧн батьыс, Ардальон Никитич да сылӧн другыс Лука Иванович. Найӧ уджалӧны ӧтлаын. Кыкнанныс гажаӧсь. Гӧтырыслӧн синнас юалӧм вылӧ, Ардальон Никитич висьтасис:

— Вӧлім футбол вылын... Сэсся буфетӧ пыралім, — лыддьӧдліс Ардальон Никитич. Зепсьыс перйис доз да пуктіс гӧгрӧс пызан вылӧ.

— Анжелика Вениаминовна, муса ань, вайышт миянлы мыйкӧ вомӧ сюйыштны. Со ми Лука Ивановичкӧд тыртчыштім.

Анжелика Вениаминовна петіс кухняӧ, а Максим уськӧдчис ывлаӧ: доз кӧ вайисны, позьӧ час-мӧд смела гуляйтны...

Дасӧд часын нин Максим кыліс восьса ӧшинь форточкасяньыс мамыслысь гӧлӧссӧ:

— Макс, волы пырав гортӧ. Зэв ёна колан.

— Мый лоис? — пырӧм бӧрас кашкигтыр юаліс Максим.

— Нинӧм эз ло, — шуис батьыс. — Лок, картіасьыштам. Ми мамыдкӧд, а Лука Ивановичлӧн пӧлыс абу.

Максим картіасис бура, велалӧма нин. Лука Ивановичыскӧд найӧ батьсӧ да мамсӧ дасысь кымын кольлісны дуракӧн.

— Молодеч, Макс! — ошкыштіс батьыс. — Юр вемыд зэлыд, уджалӧ.

А кор помалісны картіасьӧм, Анжелика Вениаминовна бара кутіс кевмысьны:

— Макс, муса пи, зӧлӧта ёкмыль, пуксьы да урокъястӧ помав...

— Мамуля, ме талун мудзи нин...

— Вот тэныд и на... Ардальон, а Ардальон! — Анжелика Вениаминовна кевмысьӧ-норасьӧ верӧсыслы. — Ме сылы кӧсйи деньга сетны и сеті... А сійӧ кӧсйысис урокъяс вӧчны и эз вӧч...

Батьыс довкйӧдлӧ юрнас: «Ай-ай-ай!», но Максим тӧдӧ нин, батьыс оз скӧрав. Мӧдарӧ, батьыс нимкодясьӧ аслас пиӧн. Максим пуксис батьыс дорӧ, ая-пиа пӧся сёрнитӧны футбол йылысь, торъя ворсысьяс йылысь.

— Макс, дыш абу дыш, а уроктӧ ковмас помавны, — бара пондіс тевгыны мамыс.

— Да, ковмас, Макс, — содтіс батьыс.

Максим юрсӧ ӧшӧдӧмӧн бӧр муніс аслас жырйӧ да пуксис пызан сайӧ. Восьтіс задачник. Эз на коль и минута, горӧдіс:

— Пап, папуля!..

— Мый нин лоис?

— Волы, пӧжалуйста, отсышт!..

— Мый отсавны?

— Да, задачаыс оз пет.

— Век тэнад оз пет... Думайтны колӧ... Юрыд нӧ мый вылӧ?

— Условиесӧ, буракӧ, дзугӧма.

— Дзугӧма кӧ, дерт, оз артмы... Вайлы, инӧ, видзӧдла, — Ардальон Никитич пырис Макс дінӧ. — Мый нӧ, кӧні? Кутшӧм задача?

— Да, со этайӧ, — чуньнас чуткис книга лист бокӧ Максим.

— Да-да-да, — лыддис сійӧ. — Видзӧд, кыдзи ме вӧча. Первой со тадз: умножитам... Сэсся вот тадз эсійӧс чинтам, сэсся эта вылӧ юкам. Видзӧдлы ӧтветсӧ. Лӧсялӧ?

— Ой, папуля! Тэ жӧ молодеч! Лӧсялӧ ставыс...

— Думайтны колӧ юрнад, пиук.

— Папуля, тэ жӧ инженер, быдтор кужан!.. — батьсӧ ошкыштіс Макс.

Ардальон Никитич пинас вӧлі дӧвӧль, и, мӧдарӧ, пиыс батьнас вӧлі дӧвӧль... Сэсся кыкнанныс пуксисны телевизор дорӧ.

Аски рытнас, кор Ардальон Никитич локтіс гортас, Анжелика Вениаминовна пыригас на кутіс норасьны сылы:

— Тӧдан, Арик, мый? Школасянь звӧнитліс Макслӧн класснӧй руководительницаыс... Куим записка пӧ нин ыстылім, корлім тіянӧс школаӧ...

— Ме некутшӧм записка эг аддзыв, — вочавидзис Ардальон Никитич.

— Ме, ме эг жӧ аддзыв... Двойкаыс уна да дневниксӧ пӧ косялӧма... Велӧдчӧ пӧ лёка... Хулиганитӧ... Да ещӧ шуис, лёка пӧ воспитайтанныд, — лыддьӧдліс Анжелика Вениаминовна. — Ми лёка воспитайтам? Сылӧн эм аслас комната. Став учебникыс эм. Пыр деньга сеталам кино вылӧ... Куимӧн лелькуйтам сійӧс... Вот тайӧ да... Лёка пӧ воспитайтанныд? Да колӧ жӧ думыштны тайӧс... Но ме тадз тайӧс ог коль. Аски жӧ директорыслы жалӧба гижа. Мед велӧдыштасны сійӧс... татшӧм «руководительницасӧ»...

Этшсьыс петӧм Анжелика Вениаминовна некыдз оз вермы ӧвсьыны.

А Максим сійӧ каднас бара чужъяліс футбол.