НИМЛУН КЕЖЛӦ КОЗИН
Дима велӧдчӧ первой классын. Талун сылы тырӧ стӧч кӧкъямыс арӧс. Сылӧн нимлуныс веськалі буретш вӧскресенньӧ лунӧ, и вештыны сійӧс мӧд лун вылӧ оз ковмы. Висьӧ кӧ, шуам, тэнад пиньыд, то поликлиникаӧ верман мунны аски либӧ недель мысти, а нимлун нюжӧдны оз шогмы... Дима радейтіс чужанлунсӧ, сы вӧсна мый сэки вайлісны сылы уна пӧлӧс козин. Тайӧ пӧрйӧ бокӧвӧй йӧзсӧ некодӧс эз корны. Нимлун вылас лоӧны сӧмын дедыс да бабыс, кодъяс тӧрыт рытнас воисны сиктысь.
Дималӧн мамыс пусис-пӧжасис кухняын, дасьтіс праздник кежлӧ ӧбед.
Дималӧн сьӧлӧм вылас вӧлі кыпыд, мыйӧн садьмис, трусик кежсьыс котӧрӧн муніс мамыс дорӧ.
— Мам, а мам! А кӧнӧсь нӧ дедуля да бабуля?
— Кӧнӧсь? Найӧ ӧд тэ моз оз узьны... Мунісны базарӧ тэныд козин корсьны... Тэ мун да мыссьы, сэсся ассьыд комнататӧ идрав, чачаясыд джодж шӧрас валяйтчӧны, — тшӧктіс мамыс.
— Ладнӧ... Удита на. Мам, а мам?.. А бабыд миян космосӧ лэбліс?..
— Мыйла космосӧ? — эз гӧгӧрво мамыс.
— Да сылӧн жӧ морӧсас Зарни Звезда дзирдалӧ да Ленин орден... Звездасӧ сетӧны налы, коді лэбзьылӧ космосӧ... Тайӧ меным Ваня Титов висьталіс.
— Ай-ай-ай! Космосӧ, шуан? Да тэнад бабыд комын во сайӧ уджаліс совхозын дояркаӧн... Тэ... йӧвсӧ юны радейтан? А выя няньтӧ?
— Дерт жӧ радейта...
— То-то... Вот сійӧ, тэнад бабыд, тэнӧ да уна-уна челядьӧс вердіс йӧвнас, и выйнас... Со и сылы дыр да бура уджалӧмсьыс сетӧмаӧсь Герой нимсӧ... Ӧні сійӧ пенсия вылын, оз нин уджав, со локтӧмаӧсь дедыдкӧд миянӧ гӧститны, тэнӧ видлыны... Локтас да тэ ачыд юась бабыдлысь. А ӧні марш, мун идрав комнататӧ, — найӧ регыд локтасны.
Дима тэрыба лӧсьӧдіс ассьыс крӧватьсӧ, тупкис сійӧс мича выль покрывалаӧн, сэсся кутіс чукӧртны ассьыс чачаяссӧ. А чачаыс вӧлі уна-уна. Мыйсюрӧ сійӧ тэчаліс ыджыд кӧрӧбкаӧ да вештіс крӧвать улас. Ассьыс «армиясӧ» петкӧдаліс коридорӧ ӧдзӧс дорас да сувтӧдаліс стройӧ. Медводзын сулалісны танкъяс, на бӧрти артиллерия — пушкаяс да ракетаяс, а на бӧрын — эзысь салдатъяс. Бокынджык — самолётъяс да корабльяс. Сэсся морӧсас сійӧ ӧшӧдіс выль ыджыд автомат, кодӧс тӧрыт козьналіс сылы мамыс.
Автоматыс вӧлі настоящӧй кодь, гораа трачкӧдчис-лыйсис, а лыйсигас ствол помсьыс сявкйисны-петісны гӧрд би кывъяс... «Муна да дзеба сійӧс ӧдзӧс сайӧ, — думыштіс Дима. — А кор дед да баб локтасны, сэки ме...»
Дималы талун торйӧн гажа, инас оз ӧшйы. Кор эштӧдіс ассьыс уджсӧ, сійӧ пырис ыджыд комнатаӧ батьыс дінӧ.
— Папа, а пап! — пыригмозыс горӧдіс сійӧ. — Ме кӧсъя тэнсьыд ӧтитор юавны... Позьӧ?
— Пӧжалуйста... Мыйла нӧ оз позь? Кӧть кыктор юав, — вочавидзис батьыс да ныр улас паськӧдіс газет.
— Пап, кывзы... Тэ тӧдан, талун менам нимлун... Стӧч кӧкъямыс арӧс тырӧ... Кыдз тэ чайтан, мый эськӧ меным козьналас талун дедульӧй?.. Он тӧд?..
— Мда... Сьӧкыд, другӧ, вочавидзны тэныд, именинник ёрт... Тэ ӧд командирӧн кӧсъян лоны? А сійӧ вӧвлӧм моряк!.. Колӧ чайтны, сійӧ козьналас тэныд, шуам, зарни пуртӧса адмиральскӧй кортик... Но, а оз кӧ сійӧс, этша вылӧ нин вермас козьнавны турецкӧй сабля...
Дималы тайӧ эз кажитчы...
— Ме тэнсьыд збыльысь юала, а тэ век сералан, — шуис батьыслы да петіс мамыс дорӧ кухняӧ. Батьыс нюмъялігтыр видзӧдіс пиыс бӧрся.
Дедыс да бабыс важӧн нин кӧсйисны локны карас, но слӧймисны сӧмын ӧні. Найӧ, дерт, тӧдісны, мый внукыслӧн матысмӧ нимлун, но сельмагысь нинӧм коланаыс эз сюр. Шуисны мыйкӧ босьтны карысь, и со талун асывсяньыс мунісны базарӧ. Корсьысисны вель дыр, но нинӧм сэтшӧмыс эз сюр. Павильонысь петігас нин кутшӧмкӧ сьӧд уска дядьӧ (абу татчӧс, буракӧ, кыськӧ лунвылысь локтӧма) кутіс вӧзйыны ньӧбны аквариум. Дед думайтыштіс, сэсся донъясьтӧг и ньӧбис. Козинсӧ бура гаровтісны шыльыд бумагаӧн да кӧрталісны мича лӧз лентаӧн.
Дедсӧ да бабсӧ дыр виччысьны эз ковмы. Регыд мысти найӧ сулалісны нин квартира ӧдзӧс водзын. Дед кӧсйис нин личкыштны кнопкасӧ, медым звӧнитны, но думыштіс да веськыд кисьыс козинсӧ вуджӧдіс шуйга ки вылас. Веськыд киыс ӧні вӧлі прӧст: вермас внукыслы сетны честь да торжественнӧя чолӧмавны сійӧс. Но ӧдзӧссӧ восьтіс эз внукыс, а нылыс.
— Бур лун, нылук! — чолӧмаліс сійӧ. — А кӧні нӧ именинникыс? Ди-има, кӧні тэ, кылан?
И друг:
— Та-та-та-та-та!..
Гораа юрӧбтіс автоматнӧй ӧчередь. Би кывъясыс сявкйисны пӧрысь дед вылӧ. Сійӧ виччысьтӧмысла дрӧгмуні, шатовмуні. Орденъясыс да медальясыс зёлькнитісны, а мича лентаӧн кӧрталӧм козиныс мыні кисьыс да уси джоджас, пасьмуні. Дедлӧн чужӧмыс кельдӧдіс, а ачыс нёровтчис стен бердас да сьӧкыда лолаліс. Бабыс шемӧс сулаліс ӧдзӧс дорас...
Квартираын лоис шы ни тӧв, быттьӧ биыс кусі. Недыр мысти дед восьтіс синъяссӧ да кок увсьыс аддзис танкъяс, орудиеяс, ракетаяс, самолётъяс, а на дінын — пасьмунӧм козиныс — неыджыд аквариум. Джоджас чеччалісны кузь бӧжа кык зарни чери.
Дима сулаліс шӧйӧвошӧма, эз тӧд, мый вӧчны... А сьылі вылас бовъяліс автоматыс. Кор воис ас садяс, век жӧ шыасис:
— Тэ прӧстит менӧ, дедуль... Ме ӧд эг нарошнӧ... — пыдісянь лолаліс сійӧ.
— И тэ прӧстит менӧ, пӧрысь дедтӧ, — вочавидзис дедыс, сэсся кыкнанныс — копыртчисны да заводитісны чукӧртавны стеклӧторъяссӧ. Дедыслӧн дӧрӧм воротникыс восьса и Дима аддзис морӧссьыс, сьӧлӧмладорсьыс ыджыд шрам — кольӧм ыджыд войнавывса вунӧдлытӧм пас — пуля туй.
