Мӧд налог

Ноябрын 4-ӧд лунӧ Сӧвет власьт шуис перйыны налог: крестьяналысь эмбур босьтсьӧдӧм вылӧ.

Налог перйыссьӧ вузасьысьяслысь 50 шайт; инженеръяслысь, техникъяслысь, некӧн служиттӧг нажӧвитчысьяслысь 5 шайт, крестьянинлысь 2 шайт, рабочӧйлысь да служащӧйлысь 1 шайт.

Налог перйыссьӧ быдӧнлысь, коді вермӧ уджавны, 18 арӧссянь 60-ӧдз.

Налог оз перйыссьы:

1. Служащӧйлысь, кодъяслӧн жалӧванньӧныс 13 разрадысь улынджык.

2. Красноармеецъяслысь.

3. Милициялысь.

4. Велӧдчысьяслысь, оз кӧ найӧ нажӧвитчыны.

5. Инвалидлысь.

6. Нывбабаяслысь, эм кӧ налӧн 14 арӧсысь посни челядь.

7. Нывбабаяслысь, вердӧны-удӧны кӧ найӧ нёль морт дорысь унджыкӧс асьныс семъянысӧ.

8. Уджтӧм йӧз, кодъяс гижсьӧмаӧсь Биржа Трудаӧ.

9. Вӧвтӧм крестьянаяслысь.

и 10. Кодъяслӧн некутшӧм нажӧтка абу.

Налог мынтан срок каръясын помасьӧ декабрын 15-ӧд лунӧ 1922 воӧ, сиктъясын певральын 1-ӧд лунӧ 1923 воӧ.

Коді оз вермы мынтыны налог, позьӧ сетны прошенньӧ, медым сроксӧ нюжӧдасны, либӧ дзикӧдз мездасны налогысь. Прошенньӧас колӧ гижны, мыйла он вермы мынтыны, пуктыны тшӧтш удостоверенньӧ Исполкомысь.