Мыйла перйӧны налогъяс

Гӧгӧр киссис, жугавліс сизим вося войнаӧн. Кӧрт туйяс, паракодъяс омӧля ветлӧны, пабрик-заводъяс омӧля уджалӧны. Колӧ найӧс босьтчӧдны, дзоньтыны, выльысь вӧчны, медым найӧ важ моз кутісны уджавны. Унджык кӧ уджалӧны пабрик-заводъяс — унджык воас крестьяналы тӧвар. Лоӧ кӧ тӧвар, гӧръяс, пиняяс, быдтор, мый крестьянинлы колӧ, сійӧ пондас ассьыс овмӧс босьтчӧдны, ёнджыка видз-му уджавны, мукӧд ногӧн нажӧвитны. Сідзкӧ — крестьянинлӧн овмӧс босьтчӧдӧмыс пабрик-заводъяс уджалӧм сайын.

Пабрик-заводъясӧс дзоньтыны колӧ сьӧм, капитал. Сійӧ сьӧмсӧ государство вермӧ кык ногӧн лӧсьӧдны: лэдзны гумага деньга, либӧ перйыны вот. Гумага деньга лэдзӧм — сійӧ лоӧ удждысьӧм; гумага деньга — правительстволӧн рӧсписка. Кор правительство лэдзӧ гумага деньга, сэк сійӧ кӧсйысьӧ на пыдди мынтысьны эзысь-зарниӧн.

Войдӧр Сӧвет власьтлы сьӧмсӧ лӧсьӧдны лои гумага деньга лэдзӧмӧн. Сӧмын, кымын уна деньга лэдзан, сымын сійӧ донтӧммӧ. Сэтшӧм донтӧмман деньганад вузасьны-ньӧбасьны оз шогмы. Босьтчӧдны пабрик-заводъяс верман сэк, кор деньгалӧн доныс дугдас чинӧмысь. Деньгалӧн дон оз кут чинны сэк, кор правительство дугдас деньга лэдзӧмысь. Деньга лэдзӧмысь кӧ дугдан — ковмас правительстволы бӧр кыскыны важ лэдзӧмсӧ ас киас. Деньга кыскыны верман сӧмын вот перйӧмӧн.